Manîsa – Qezaya Giyadîn a Agirîyî û hewza Royê Muradî vera talukeya madenê zernî yo bi sîyanurî reyde rî bi rî yê. Parlamentera DEM Partî ya Colemêrgî Oznûr Bartine bale ante talanê ekolojîkî û talukeya ser çimeyanê awe û vat: “Dewleta Tirkîya bi serran o ke cografyaya Kurdîstanî de kotî de cuye bibo, ê cayî bi şîrketanê hemkaran talan kena. Na polîtîkayêka domdar a. Eke ma qalê aştî û azadîye kenê ganî dewlete koyan, awe û xozaya ma reyde zî aşt bibo.”
Madenê zernî ke Giyadîn de hetê şîrketa Turk Altin Îşletmelerî ra bi sîyanurî yeno ramitene, kewto merheleya berhemardişî. Maden hem nêzdîyê dewan o hem zî rasterast xeta fayî ya aktîfe ser o yo. Cayê madenî çimeyanê Royê Muradî ser o yo; no ro bi Awa Sîya reyde yeno pêser û Royê Firatî virazeno. Yanî qilêrîya madenî tena Giyadîn de nêmanena, heme herême û Royê Firatî de vila bena.
‘Sîyanur reseno Royê Firatî’
Bartine vat ke Giyadîn de tena zerrn nêyeno vetene, cuye yena qirkerdene û wina dewam kerd: “Giyadîn de sîyanur yeno xebitnayene. No sîyanur keweno awa Muradî, Newala Zîlanî de vila beno û heta Royê Firatî şino. Ganî ma vera talanî têkoşînêkê cîya yê xoverdayîşê ekolojîkî awan bikerê. Talan dewam keno la xoverdayîşê ma zî dewam keno.”
