Parlamentera DEM Partî ya Colemêrgî Oznûr Bartîn vera hedîseyê wesayîta zirxine ke da kênaya 7 serre ro û aye birîndar kerd, reaksîyon mojna. Oznur Bartin dîyar kerd ke ganî personelê ewleyî yê ke nê hedîseyî de qusirê înan est o, bilez wezîfe ra bêrê dûrviştiş û derheqê înan de cigêrayîş bêro destpêkerdiş.
Qezaya Geverî ya Colemêrgî de serê sibayî saete derûdorê 10:00î de wesayîta zirxine ya polîsan ke bilez şîyêne, Cehdeyê 23 Nîsane yê sûka qeza de da kêneka bi nameyê Elanûr Kina ya 17 serre ro û aye birîndar kerd. Parlamentera DEM Partî ya Colemêrgî Oznur Bartin hesabê xo yê medyaya dîjîtale ser o vera hedîse reaksîyon mojna û bêtedbîrî û bêusûlîya Wezaretê Karanê Zereyî pers kerd. Oznur Bartin bale ant bêcezaverdayîşê nê tewir hedîseyan ser o û dîyar kerd ke no hedîseyêko polîtîk o.
Eşkerayîya Oznur Bartin wina ya:
“Çatrayîrê Onur Marketî de ke girêdayeyê Cehdeyê Cengîz Topelî yo, encamê pirodayîşê wesayîtêka zirxine ke bi leze şîyêne, welatîya ma ya bi nameyê Elanur Kina birîndar bîya. Welatîya ma ke lînga aye şikîyaya û rîyê pirodayîşî ra travmaya mezgî vîyarnayo, maya aye zî xo bizor wesayîta zirxine ra xelasna. Şahidanê hedîseyî û keyeyê ke ma xo resna înan, nê hedîseyê giranî ke hetê wesayîta zirxine ya bi lez û bêkontrolî ra ameyo kerdiş dîyar kenê. Reyna bi eşkera mojneno şaristanê herême de caye pêroyî û cuya sîvîlan bêewleyî ameyê verdayîş.
Ma Wezaretê Karanê Zereyî ra persenê; do çi wext nê xebitnayîşê wesayîtanê zirxinan ê bêusûl û bêtedbîr ke cayanê pêroyî de estbîyayîş û heqê cuya sivîlan fînenê tehluke biqedîyê?
Hedîseyê wesayîtanê zirxinan ê ke Colemêrg û pêroyê herême de wazenê bibê rûtîn, a aste de nîyê ke bi vatişê ‘qezaya rêze ra’ bêrê erjnayîş; problemêko bingeyîn û polîtîk o. Na rewşe, rasterast vejîyayîşê orte yê çinbîyayîşê tedbîranê îdarî û huqûqî ya ke bi zirxê bêcezaverdayîşî ameya xurtkerdiş o. Bêcezaverdayîşê wezîfedaranê ewleyî yê ke benê sebebê hedîseyanê bi merg û birîndarbîyayîşê giranan, herinda dûrvistişê wezîfe ra pawitişê înan ê bi îmtîyazêko kerdoxî, zemînî seba nê kerdişanê xiraban amade keno. Awankerdişê dewleta huqûqî û betalkerdişê kulturê bêcezaverdayîşî hewce yo; ganî personelê ewleyî yê ke nê hedîseyî de qusûrê înan est o bilez wezîfe ra bêrê dûrvistiş û derheqê înan de prosesêko huqûqî yo bitesîr bêro destpêkerdiş.
Ez Elanur Kina û keyeyê aye rê silametî û şîfaya xêrî wazena.”
