Goreyê çapemenîya Amerîka, Rayberîya DYA’yî qerarê mudaxaleyê Îranî encamê dîyalogê çimeyanê qade û mutefîkan reyde taloq kerd. Tayê çimeyan zî dîyar kenê ke DYA’yî seba amadekarîyan bikero na gama taktîkî eşta.
Dewamkerdişê serewedaritişê şaranê Îran û Rojhelatê Kurdîstanî û hêrişê vera çalakîkeran reyde munaqeşeyê helwêstê hêzanê teberî dewam kenê. Nerazîbîyayîşanê xeylê welatan û mesajê mudaxaleyê DYA’yî ser o îhtîmalê mudaxaleyêkê vera rejîmî ameyê rojevê dinya. La 15ê çele de Serekê DYA’yî Donald Trumpî bi eşkerayîyêk îdia kerd ke rejîmê Îranî qerarê dardkerdişê çalakîkeran betal kerdo û do hêrişan vindarno. Çapemenîya Amerîkayî kewt dimayê qerarê taloqkerdişê mudaxaleyê vera rejîmê Îranî.
Goreyê agahîyanê Axîosî çimeyanê Amerîka, Îsraîl û Ereb ê dîplomasî ra girewtê, DYA’yî qerarê mudaxaleyê vera Îranî taloq kerdê.
Babeta mudaxaleyê cîdî ya
Goreyê çimeyanê Qesra Sipî Amerîka, mutefîkanê xo yê herême, çimeyê îstîxbaratî û leşkerî yê Rojhelatê Mîyanênî reyde munaqeşeyî kerdê. Xebere de ca dîyayo çimeyanê Amerîka yê sey, “Gişta Trumpî tetik ser o ya û seba mudaxaleyî amade yo” û bale ancîyena qerardarîya mudaxaleyê DYA’yî ser o.
WSJ: Qerar seba temamkerdişê transferkerdişê hêzan ame taloqkerdene
Rojnameyê The Wall Street Journalî (WSJ) zî ca da eyn babete û eşkera kerd ke Trump seba hêzan transferê Rojhelatê Mîyanênî bikero bi hewayêko zanayîş eşkerayîya taloqkerdişê mudaxaleyê dayo. Çimeyan na gama DYA’yî sey taktîk erjnaye.
‘Fermanê transferkerdişê hêzan amebi dayene’
Xebere de ame vatene ke seba amadekarîya îhtîmalê mudaxaleyê Trumpî fermanê transferkerdişê hêzan seba herêman dabi. Goreyê çimeyan raporî ke qade ra ameyê ver destê rayberîya Qesra Sipî dîyar kerdo ke îhtîmalê mudaxaleyî seba binvistişê rejîmêkî nêkeno û herême de kaosêko girdêr xo reyde bîyaro. Goreyê xebere çarçewaya fermanê transferkerdişê hêzan de keştîya teyareyanê şer ê nameyê USS Abraham Lîncoln û hacetê hêrişî erşawitê Rojhelatê Mîyanênî.
Dewletanê herême nêwaşt mudaxale bibo
Televîzyona El-Meyadinî zî derheqê babete de ca de xeberêk û agahîyî ke çimeyanê dîplomatîkî ra girewtê, ê weşanayê. Xebere de ame eşkerakerdene ke dewletanê herême DYA’yî ra waşto ke mudaxaleyê Îranî nêkerê. Ame eşkerakerdene ke dewletê herême vejîyayîşê kaosî ra tersayê û înan dîyar kerdo ke ê nêeşkenê binê nê kaosî ra vejîyê.
‘Amadekarîyê dimayê mudaxaleyî qîmî nêkenê’
Xebere de ame eşkerakerdene ke waştişanê dewletanê mutefîkanê Amerîka yê herême hezanê herême zî bale anto zehmetîyanê mudaxaleyî û rewşa dimayê mudaxaleyî ser o. Ame eşkerakerdene ke Washingtonî qerar dayo ke amadekarî seba rayberdişê şert û mercanî ke dimayê mudaxaleyî vejîyê orte, qîmî nêkenê.
Rejîmî apey game eşt
Çimeyan dîyar kerd ke Tehranî zî xo bi rayîranê cîya xo resnayo rayberîya DYA’yî û sozê vindarnayîşê zordarîya vera çalakîkeran û betalkerdişê dardekerdişan dayo.
