Duran Kalkanî vat: “No proses ya ser keweno ya zî sernêkeweno. Eke sernêkewo felakete bena. Coka ma qerardar ê ke semedê serkewtişê prosesî çi hewce keno ma do bikerê.”
Endamê Akademîya Zanistanê Sosyal a Abdullah Ocalanî, Duran Kalkan programêkê taybet ê Medya Haber TV’yî de rojevî erjna. Duran Kalkanî vat: “Rayîrê ameyoxê azad û demokratîkî yê Tirkîya tena no proses o, famnêkerdişê na raştîye beno ke bibo sebebê felaketî.”
Duran Kalkanî nê vatî: “Rayber Apoyî rayîrê çareserî pêşnîyaz kerdî. Seba ke pratîk de zî verê nê bêro akerdene veng da rêxistine û şarî. Na çarçewa de gamê pratîkî ameyî eştene. Tewr peyên 26ê teşrîna peyêne de qerarê peyserantişê gerîlayan ame parekerdene. Bi waştiş û zorê tayînan nêbeno. Stratejîyêk yena caardene; nê semedî ra gamê cesur û qerardarî yenê eştene. Rayber Apoyî nê gamî sey yewhetin û nîyetê holî pênas kerdî. Nê gamî Rayberîye û sey têgêrayîşî ma eşt ê. Hinî verê merhaleya diyîne de astengî nêmendê.
Keyeyan û Heyetê Îmralîyî yê DEM Partî Rayber Apo zîyaret kerd û goreyê zanayîşan ke ameyî dayene Îmrali de çîyêk nêbedilîyayo. Heta ke şertê Rayber Apoyî nêrê bedilnayene hetê kurdan senî eşkeno prosesî rayra bêro? Rayber Apo senî eşkeno prosesî rayra bêro? Ganî biney îmkan, firset bibo ke biaçarîyo têkoşînê demokrasîyî. Xora komîsyonî zî xebatêka newa nêkerde. Hema nameyê mesele zî tam nêameyo panayene. Nêvanê çarçeweya huqûqî de se beno. Komîsyonî Rayber Apo zî zîyaret nêkerd. Vatişê Erdoganî û îdarekaranê AKP’yî yewbînan nêtepişenê.Yew leylîye est a.
Sîyasetê Tirkîya de hema gamêka newa çîn a. Sîyasetê Tirkîya îmtîhano holî nêdano. No sîyaset nizdî ra do birijîyo. Halbukî şertî tam goreyê ci yê. Rayber Apoyî merhaleya diyîne wina pênas kerd: Gamê ke hewce kenê bêrê eştene, semedê demokratîkbîyayîşê Tirkîya û çareserkerdişê meseleya kurdan entegrasyono demokratîk, vetişê qanûnanê azadîye. Dîqet bikerê ma semedê xo çîyêk nêwazenê. Nika vîyartişê merhaleya diyîne de tengayîyêke est o, tîrêke est a. Ma qerardar ê, xebityenê, têkoşîn kenê. Ganî her kes zî wina bikero. Yeno famkerdene ke merhaleya diyîne bi qerarêkê çewî nêbeno, ganî proses komelkî bibo û komel bi têkoşînî nê astengan wedaro. Coka ganî her kes prosesî raşt fam bikero û goreyê ci têkoşîn bikero.
No proese xeylê alternatîfan ra yew nîyo. No proses nêbo, nêbeno. Eke ser nêkewo Tirkîya nêeşkena payra bimana. Serkewtişê Vengdayîşê Aştî û Komelê Demokratîkî yê Rayber Apoyî tercîhêkî ra wêter, mecburîyet o. Semedê resayîşê ameyoxê demokratîkî ganî no bêro caardene, nêbo verê felakete abeno. No proses ya serkeweno yan zî ser keweno. Eke sernêkewo felakete bena. Coka ma qerardar ê ke semedê serkewtişê prosesî çi hewce keno bikerê. Hinî peyser agêrayîş çîn o. Ê ke peyseragêrayîşî pawenê xeyal kenê. Prosesê Haştîye û Komelê Demokratîkî, prosesê têkoşînê sîyasî demokratîkî yo. Bi nê têkoşînî teberê serkewtişî de yewna rayîr çîn o.
Estbîyayîşo rêxistinî yê PKK’yî qedîya, ma bingeyê manîfesto de prosesê bedilnayîş, newebîyayîşî de yê. Bingeyê têgêrayîşê komunanê demokratîkan de her warî de, herême ra pabesteyê sîyasetê demokratîkî xebatan rêxistine kenê, aver benê, ma do avar bêrê. No do sey 2004-2005 corî ra ver bi cêrî nêbo. Herême ra bi rêxistinbîyayîşî do bêro averberdene û her ca de do sîyaseto demokratîk bêro esasgirewtene. Xora na stratejî do bingeyê asayîşê huqûq û xopawitişî de bêro averberdene.
Ma serrgêra verêne ya PKK’yî de ke estbîyayîşê xo yo rêxistinî qedînayo. Kongraya 12. erjê PKK’yî pênas kerdî û tarîxî rê kerdî mal. PKK’yî rê hinî peyser agêrayîş nêbeno la erjê ke PKK’yî vetê werte ciwîyenê û do biciwîyê. PKK tarîxêk o. Tarîx zî ne tekerrur o ne zî zanayîşanê kronolojîkan ê merdeyan ra îbaret o. Tarîx zanisto gandar yo; ewroyî bewlî keno, ameyoxî roşn keno, rayîr mojneno. Ganî 27ê Teşrîna Peyêne bingeyê nê erjan de bêra wayîrvejîyayene.”
