Vernîya Merkezê Pêroyî yê CHP’yî de mabênê polîs û girseyî de tengijîyayîş vejîya. Badê tengijîyayîşî polîsan dorûverê Merkezê Pêroyî yê CHP’yî dorpêç kerd û nêverdenê girse û rojnamegerî derbasê zereyî bibê.
Badê qerarê “Butlano mutlaq” ê vera kongreya CHP’yî ke Serekê Pêroyî Ogur Ozel amebî weçînayene û cayê ey de serekê verê Kemal Kiliçdaroglu sey Serekî CHP’yî ame tayînkerdene. Vera nê qerarî hetkarê CHP’yî vernîya Merkezê Pêroyî de kom bî. Serekê Pêroyî yê CHP’yî Ozgur Ozel ke wezîfe ra ameyo girewtene vengdayîşê welatijan kerd ke verê Merkezê Pêroyî de dest bi nobete bikerê. Dimayê vengdayîşê Ozgur Ozelî çalakîya ke dest pêkerdbî, verê Merkezê Pêroyî yê CHP’yî de dewam kena. Kemal Kiliçdaroglu zî seba ke Merkezê pêroyî teslîmê înan bikerê muracatê walîtî kerd. Merkezê CHP’yî hetê polîsan ra ame dorpêçkerdene.
Polîsan Merkezê Pêroyî yê CHP’yî bi TOMA û wesayîtan dorpêç kerd û dekewtişê merkezî ame astengkerdene. Badê dorpêçê polîsan dekewtişê merkezî yê rojnameger û welatijan zî ame astengkerdene. Welatijê ke vernîya Merkezê Pêroyî yê CHP’yî kom bîyê bi sloganan reaksîyon mojna dorpêçê polîsan. Sewbîna saetane serê sibayî de heyetêke hetê Kemal Kiliçdaroglu ra amebî wezîfedar kerdene, waşt bikewo Merkezê Pêroyî yê CHP’yî. Naye ser mabênê heyetî û girseyî de pêkewtiş vejîya. Welatijê ke nobete de yê destûr nêdanê heyet û polîsî bikewê Merkezê Pêroyî.
Dorûverê Merkezê Pêroyî yê CHP’yî dorpêçê polîsan dewam keno. Nê saetan de polîsî mudaxeyê girseyî kenê.
