Yadîgar Dogan Topçûye 24 serrî xerîbîye ra dima ama dewa xo Salordeka rindeke. Kesê ke seba rindekîya Salordeke yênê çopê xo erzenê ey dormalan û şonê înan ra vana: “Dormeyê xo pak bîjerê, no welat yê ma pêrune yo.”
Dêrsim de eke payîz ame, xoza kincanê xo yê renginan dana xo ra. Qomê Dêrsim seba ke na rindekîye bivênê sonê mintiqeya Salordekê. Şarê Dêrsimî çiqas zilm û zorîye bivêno zî welatê xo ra wayîr vejîyayîş ra dûrî nêkuno, paştî dano jubînî. Awanê xo ra, koyanê xo ra, jîyar û diyaranê xo ra, peskûvîya ra yabanî ra wayîr vejînê wazenê ke her çî serê hardan de, binê asmênî de rindîye bivêno.
‘Dormê xo pak bîjerê, no welat yê ma yo’
Kesê ke Salordeke de nusenê ro, bê meyman nêmanenê çike her kes vazeno ke rindekîya nê cayî bivêno. Asma payîzê peyenê de meymanê Salordeke tayêna benê zêde. Çike rindekîya xo ya payîzî nêna salixan.
Yadîgar Dogan Topçûye, nika dewa xo Salordeke de nusena ro. Wexto ke dewlete 1994î de dewî kerdî tal înan zî bar kerd şîyî şaristanê Bûrsa. 24 serrî Bûrsa de mendê. Welatê xo ra dûrî mendene û weşîya xo teber de ramitene giran yena û rojê bar kena yena dewa xo. Nika zî venga qomê xo dana vana: “Dormê xo pak bîjerê, no welat yê ma yo. Agêrê berê welatê xo, xozaya xo ra jîyar û dîyaranê xo ra wayîr vejîyê, zonê xo xo vîrîra mekerê.”
Xozaya xo ra wayîr vejîmê
Yadîgar Dogan Topçûye vatena xo wina domnê: “Sarê ma yo ke teber de seba vênitena dewa ma yeno, rindekîya dar û bere ma vîneno wa dormeyê ma, xozayê ma qilerin mekerê, adir ke vesnenê dimera ke şî wa adirî bi sayne. Şîlanan û şîran danê arê û her cayî kenê xiravin.
Dewa ma zaf rindeka, usarê xo, amnonê xo, payîz û zimistanê xo mirê zaf rindek yeno. 1994î de dewa ma kerde tal û ma şîme Bûrsa. 24 serrî ûzade mendîme. Ma şêr kerd ke nêbeno û ma bese nêkerdîme ke woşîya xo biramime, peyser ameyme dewa xo. Dewe de bonî viraştî, lovajû rameme, hengûre est a, sayî, mûrî her çî est o. Dormeyê ma jîyar û dîyarûno. Îtîqatê ma zafo.”
‘Qomê ma paysêr bero welatê xo’
Yadîgar Dogan Topçûye venga sarê xo dana û vana ke: “Qomê xo rê vame ke, peyser bêrê dewanê xo. Dewî zaf rindekê, verênde rayî çin bî, serê bonan here bîye, çila çeyî çin bîye. Nika her çî est o. Îtade fabrîqa û kar bibîyêne cencû amêne, towa ke çin bî kes nêno.”
‘Hatanû nika ma saya jiyar û dîyarû ra lîngûnê xo ser vînetîme’
Qesaya xo ya pêyêne wina ya: “Maye û pîyê ma, kalîkê ma, jîyarû ra înam kerdêne, hetanû nika ma saya jiyar û dîyarû ra lîngûnê xo ser vinetîme. Zonê ma vînd mebo. Zonê xo ra wayîr vejîme, cencû zon bimisê, pîlûnê ma de qisêy bi kerê. Nika kokimê ma, lete kirmançkî, lete tirkî qisey kenê û zon kerdo xo vîrîra şîyê.”
