Heta ke hîna kehene bêra dîyayene, estanika yewin a ke dinya de bi nuştişî ameya arêdayene “Adapa” ya. Na estanike Î.V serranê 1750an de biqanûnê Hûmurabî reyde ameya nuştene.
Heta ke hîna kehene bêra dîyayene, estanika yewin a ke dinya de bi nuştişî ameya arêdayene “Adapa” ya. Na estanike Î.V serranê 1750an de biqanûnê Hûmurabî reyde ameya nuştene. Nuştoxanê Sûmerijan na estanike bi nuştişê mixan tabetlan ser o nuşta. Babeta ci bawerî ya.
Goreyê xebera ANF’î Sey na estanike hîna zaf estanikî est ê. Senî ke yeno zanayene, estanikî teyna bi fekkî nêameyê nêreştê roja ewroyî, di hermeyan ra aver de şîyê. O yo verên fekkî, dîyin zî nuştekî yo.
Ma vat ke estanika tewr verên a nuştekîye “Adapa” ya; ya dîyine zî Î.V serranê 1200an de tarîx de cayê gêna. Yeno qebulkerdene ke padîşahê Misrî, Xetôn (Akhenaton), seba domananê xo estanika “Di Birayan” sey derse daya wendene. Na estanika nuştekîye serra 1932 de gorê Akhenatonî de ameya dîyayene.
Ewro dinya de 770 zêde varyantê na estanike est ê.
Na estanike bi kilmekî wina ya:
“Adapa, xortêko jîr û xebatkar o. Mîyanê Dîcle û Firatî de qanalanê awe akeno, fîdananê meyweyan û sewzeyan nano ro. Labelê seba ke merdimêko mergdar o xemgîn û bêhuzur o. Seba ke mergî rê çare bivîno bi keştîyêk serê Firatî de keweno rayîrwanîye. O do bireso Homayê Asmênî û ci ra biperso ke ‘Însanan bêmerg biko’.
Homayê Erdî ci ra vano: ‘Nano ke o dano to mewere, awa ke o dana to meşeme. Eke ti nînan qebûl bikerî, ti do mergdar bibî.‘ Adapa dima nê nasîyatî keweno rayîr. Rayîr de va yelkenanê keştîye şikneno û keştîye awe ra şona. O zî perrê vayî şikneno.
Homayê Asmênî xortimê xo keno derg û ey anceno cor leyê xo û ey ra vano: ‘Ti çira perrê vayê mi şikna?!’ Adapa zî vano: ‘Ti çira ma mergdar kerdî? Cuye weş û rengin a, ma nêwazenê bimirê!’ No pawitiş şono weşê Homayê Asmênî û nanê bêmergî dano Adapayî. Labelê seba ke ey soz dayo Homayê Erdî nê nanî qebûl nêkeno. Nê semedî ra a roje ra tepîya merdîmî bene mergdarî. Adapa şewq û şayîya cuye vîndî keno, morale merdiman zaf beno xirabin.
O taw dînê semavî yê Yewhomayî resenê îmdadê ey û vanê: ‘Teyna ke ti merdimêke rast, xebatkar û xuyeweş bî, xelisîyayîş û reyna weşbîyayîş est o, a dinyaya bîne de zî ti do biciwî.’ Bi no qeyde reyna keyf û şayîye danê merdiman.”
