Dewa Omyanisî serranê 1990î de ameye vengkerdene. Dewijê dewe dîyar kerd ke demo ke dewe ra koçber bîyê, hetê aborî ra gelekî zehmetî dîyê la demo ke agêrayê dewa xo problemê înan ê aborî nêmendê.
Dewa Omyanis a girêdayeyê qezaya Berwarî ya Sêrtî serranê 1990î de hetê dewlete ra ameye vengkerdene û 60 keyeyê ke o wext dewe de ciwîyayêne, gelekî şaristananê Kurdîstan û Tirkîya ra vila bîyê. Keyeyanê ke koçber bîyê înan ra yew keyeyê Kulter o. Keyeyê Kulter dima ke 25 serrî Şirnex de mend, serra 2015î de agêra dewa xo û no 10 serrî yo bi 3 keyeyanê bînan cuya xo dewe de domneno.
‘Demo ke ma Şirnex de bîyê, ma feqîrîyêka pîle dîye’
Endamanê keyeyî ra Kasim Kulter dîyar kerd ke demo ke ê koçber bîyê, gelekî feqîr bîyê û wina dest bi qiseykerdişê xo kerd: “Ma serranê 90an de koçber bîyê û şîyê Şirnex. Şirnex de cuya çin bîye. Xeylê çîyî ameyê ma ser û ma cuyêka feqîr vîyarnaye. Xeylê reyan ma pawitêne ke kesê zengînî zikatê xo bidê ma. Ma demêko derg Şirnex de gawanî kerd û wina debarê xo kerd. Serra 2015î de ma dewlete ra destûr waşt û ma agêrayê dewanê xo. Ewil ma 5 rojan kon de mendê û dima ra ma dest pêkerd û ma awanîyêk awan kerd. Ewil ez şîya dewa Hosyan û mi dewijan ra çend heywanî girewtê. Dima ma heywanê xo miqate kerdê û nika bîyê garanêk.”
‘Hetê aborî ra êdî ma muhtacê tu kesî nîyê’
Kulterî îfade kerd ke ê debara xo bi berhemardişanê xo kenê û wina vat: “Nika biz û mêşneyê ma bîyê 200-300 heb. Înan ra vete ma kerg û hingan zî wayîr kenê. Reyna ma bostan û daranê fêkîyan ronenê û demo ke zaf bibê ma roşenê. Sewbîna penîr, goşt û hingimên zî eke ma rê zaf bibo, ma roşenê. Demo ke dewa ma ameyê vengkerdene 60 keyeyî dewe de est bîyê. Nika ma 4 keyeyî agêrayî û êdî hetê aborî ra ma muhtacê tu kesî nîyê. Heme çîyê ke ma rê lazim ê, ma herra xo ra gênê û berhemardişê ke ma roşenê, ma pê înan zî lazimtîyanê xo yê bînan gênê.”
Kulterî tewr peyên bale ant talanê daristanan û qiseykerdişê xo wina qedêna: “Cerdevanan ewşl dest bi birnayîşê daristananê ma kerd. Derûdorê dewa ma darê ke înan rê lazim ê heme birnayê û nika zî şîyê herêmanê bînan de daristanan birnenê.”
