DFG’yî rojnameger Seyît Evranî ard xo vîr û vat ke do vîrameyîşê eye têkoşînê şarê kurdî de biciwîyo.
Rojnameger Seyît Evran 22ê êlula 2023î de Vakur û Rojhelatê Sûrîye de riyê nêweşîya xo ra cuya xo vîndî kerdbî. Komela Rojnamgeran a Dîcle Firatî (DFG) bi munasebetê serrgêra wefatê Evranî, hesabê xo yê X’î ser o eşkerayî daye û Evranî ard xo vîr. DFG’yî parekerdişê xo de vat: “Vîrameyîş û mîraso ke ey xo ra pey verdayo, do têkoşînê şarê kurd ê pîlî de biciwîyo.”
DFG’yî wina vat: “Seyît Evran pêroyê cuya xo de seba şarê kurdî têkoşîn da. Ey çîyê ke pêroyê Kurdîstanî de qewimîyenê, bi qelem û kameraya xo antê pêser. Seyît Evrano ke rixmê heme zehmetîyan qadê şerî terk nêkerdî, na raywanîya pîroze ke ey serranê 90an de Gurbetellî Ersoze dest pêkerd, Vakur, Başûr, Rojhelat û tewr peyên zî Rojava da domnaye. Ey çîyê ke şarê kurdî dîyêne, rastîya xoverdayîş û têkoşînê şarê kurd û Kurdîstanî xeta Çapemenîya Azade de resnaye raya pêroyî ya dinya. Seyît Evrano ke nê têkoşînê pîroz de bi enerjî, heyecan û bawerî rayra şîyêne, tewrê karwanê ‘Şehîdanê Çapemenîya Azade’ bi. Vîrameyîş û mîraso ke derwêşê Çapemenîya Azade xo ra pey verda, do têkoşînê şarê kurd ê pîlî de biciwîyo.”
