Alî Riza Arslano ke esteyê lajê ci yo ke wextê qedexeyanê tebervejîyayene de cuya xo vindî kerdo, 7 serrî dima qutîyêke de teslîmê ci bîbî, babeta prosesî ser o wina va: “Kesê ke sey mi dej dîyê û mexdûr ê, aştî wazenê.”
Esteyê lajê Alî Riza Arslanî, Hakan Arslanî ke 2016 de Sûrê Amedî de wextê qedexeyanê tebervejîyayene de cuya xo vîndî kerdo, 7 serrî dima yew qutîye de teslîmê pîyê ci bîbî. Ajansê Mezopotamya dima ke dîmenê babî Arslanî ke esteyanê lajê xo qutîye de beno, servîsê aboneyanê xo kerd, dormereyê cîya cîyayan ra bertekî ameybî.
Alî Riza Arslano ke 3 serrî yo esteyê lajê xo qutîye de teslîm girewtbi, waşt ke seba ke proseso ke semedê çareserkerdişê problemê kurdan yeno averberdene bigêro ser, ganî her kes xîret bikero.
‘Her kes şerî ra dej anceno’
Alî Riza Arslan ard ziwan ke lajê ci 2016 de Sûrê Amedî de dinyaya xo bedilnayo û o nê prosesî de şîyo Amed û va ke ey cenazaya lajê xo encax 2022 de girewto.
Arslanî derheqê prosesî de wina va: “Aştîyêka rinde do biba. Meclîs de komîsyon zî kom bîyo. Ganî şarê kurd û tirkî êdî nê dejî nêancê. Ma aştî wazenê la hetêk zî aştî nêwazeno. Ê hetî hem ma ra hem zî dewlete ra xo kerdê mird. Ewro zî çîyêk destê înan de nêmendo, coka aştî nêwazenê. Kesê ke sey mi dej dîyê û mexdûr ê, aştî wazenê. Çi beno wa bibo, ma aştî wazenê û seba na xusûsî zî têkoşîn danê.”
Arslanî da zanayîş ke waştişê Koma Aştî û Komelê Demokratîkî yê ke çekan verada û sîyasetê demokratîkî bikerê, heqdar vîneno û îzeh kerd ke ganî dewlete sererastkerdişêk bikero û wina dewam kerd: “Dewlete game nêerza, rêxistine eşkena çi bikera? Dewlete wa nê hepsîyanê sîyasîyan verado û wa azad sîyasetê xo bikerê. Meselaya aştîye girêdayeyê dewlete ya, dewlete game bierza her çî rind beno.”
Arslanî eşkera kerd ke wexto ke proses yeno averberdene, hêrişê vera ziwan û nasnameyê kurdan zêdenê û wina peynîya qiseykerdişê xo ard: “Kesê ke aştîye ra bawer nêkenê, çîyêk ra bawer nêkenê. Wa aştîye ra bawer bikerê. Wa her kes destê xo bido binê kerraye. Ê yê ke muzîkê kurdkî cînenê, hêrişê înan kenê. Ganî dewlete na problemî çareser bikero. Ziwanê mi kurdkî yo. Eke ez kurdkî qisey kena, ti seba çi hêrişê mi kenê? Ganî prosesanê winayênan de her kes baldar bibo û seba aştîye xîret bikero.”
