Dewa Havaçorî ya girêdayê qezaya Pulurî ya Dêrsimî de seba pawitişê xoza, hetê dewijanê Havaçorî ra nobete amebî dest pêkerdene dewam kena. Serekê Komeleya Dewa Havaçorî Zeynel Hayiroglu û Meral Dînler veng dane şarê Dêrsimî û vanê: “Eke ma ewro hardê xo rê vilikanê xo rê û xozaya xo rê wayîr nêvejîyê meşte zaf beno erey.”
Dewijê Havaçorî û qomê Dêrsim, seba xozaya xo, seba vilikanê xo, seba gûl û sosine xo, koyê xo re wayîr vejîyayenê. Hîre serrî yo ke dewijî Havaçorî, nêzdîyê dewa xo de çadire akerda, jû asme xozaya xo ra wayîr vejîyene. Komeleya Dewa Havaçorî ra Zeynel Hayiroglu û Meral Dînler ma re wayîr vejîyayişê xozaya xo ser qisey kerd.
‘Ewro roşenê meşte çi wenê’
Serekê Komeleya Dewa Havaçorî Zeynel Hayiroglu qiserkerdîşe xo dîyar kerd ke ma hîre serrî yo ke seba wayîr vejîyayîşê xozaya xo çadir akerda û wina vat: “Êyê ke yenê koyê ma, ma ra miradîyene vanê ke, vernîya ma çira gênê, ma xo rê pincar benê roşenê. Çîyê wina ma nêwazemê. Koyê ma de rîveş, poxik, savile, heluge, so vejîna. Daranê ma rê, koyanê ma rê, vase ma rê, awa ma rê kes towa mêkero. Welate ma de, dormê warê ma de, dormê banê ma de vaşê koyî pirr bî, nika towa nêmendo. Teber de yenê dane arê benê roşenê. Emser Komeleya Dêrsimî ra, şare Dêrsimî ra ameyîme jû ca. Seba wayîrwejîyayîşê xoza ma pîya xebitîyenê.
‘No welat tena yê ma nîyo’
Zeynel Hayiroglu peynî qiseykerdîşe xo de wina vat: “Perûne vengê ma bihesnê. Kam ke yeno koyê ma, bare xo bigîro. Seba werdene towa nêbeno. Domanîya ma de senî nê koyî de ribeş zaf bî, nika çin o. Dewlete vilike ma rê, xozaya ma rê wayîr vejîyo. Welate xo re wayîr vejîme.”
‘Pêro pîya xozaya xo rê wayîr vejîyayîme’
Meral Dînler, veng dana qome xo û wina vana: “Îta hardê ma yo, vilikî vilikê ma yê, ribês, ribêsê ma yo. hardê xo rê, vilikanê xo rê, welate xo rê wayîr vejîyê. Bêrê pêser, paştî bidê jûbînî, ma wayîr ke nêvejîyayê me, pêrune qedêno.”
Nobeta ke Newala Havaçorî de dewam kena hetê xeylê hunermend, roşinvîr, sîyasetmedar, temsîlkaranê sazgeh û komeleyan ra yena zîyaretkerdene.
