Demêkî de ke cehdê grûbanê girêdayeyê Tirkîya yê seba dorpêçkerdişê Kobanî dewam kenê; heto bîn ra zî hêzanê girêdayeyê hukmatê Şamî dewanê mabênê Kobanî û Girê Sipî de dest bi provokasyonan kerd.
Hukmatê Demkî yê Sûrîye bi paştîdayîşê Tirkîya cehd keno ke Peymana 29ê çeleyî vengvejo. Xeta sînorî û dewanê Kobanî de têgêrayîşê leşkerî û cehdê provokatîfî zêde benê. Goreyê melumatanê peyênan, demêkî de ke hêriş û cehdê grûbanê ke girêdayeyê Tirkîya yê seba dorpêçkerdişê Kobanî dewam kenê, hêzê Hukmatê Şamî zî kewtê mîyanê têgêrayîşî. Grûbêka ke çeteyanê Tirkîya ra yena pê, dewanê mabênê Kobanî û Girê Sipî de cehd kena ke bikewê dewan ke binê kontrolê HSD’yî de yê û kaos vejê.
Çeteyê girêdayeyê Tirkîya kaos vejenê
Ame eşkerakerdene ke grûb û hêzê girêdayeyê Şamî, cehd kenê ke vîyarê ê dewan ke mabênê Kobanî û Girê Sipî de yê û binê kontrolê Hêzanê Sûrîyeya Demokratîke (HSD) de yê. Nê cehdî hêzanê Şamî nê wextî de, sey gamêka provokatîf yenê erjnayene û na rewşe tehlukeya zêdebîyayîşê kaosî herême de vejena. Reyna ame zanayene ke Tirkîya zî bi rayîrê grûbanê ke girêdayeyê aye yê nê provokasyonan sûr kena.
