Mekanê Duzgin Bawayo ke Qezaya Dêrsimî Qişleye de ro û bawerîya Elewîyan de cayêko zaf pîl gêno çend rojî nayera ver amebî kinitene. Vera na kinitene û heqeretî şarê Dêrsimî û elewîyanê dinya heme her ca de reaksiyon nişan da.
Qomê Dêrsimî ewro şî serê mekanê Duzginî de Cem girêda. Pîr û talîban, der û cîranan, kam ke jîyar û dîyaranê xo ra wayîr vejîno pero pîya amey pêser. Îtîqat û rindîye ser çîlayî veşnayî û loqme kerd vila, gulbangî dayî. Sarê Dêrsimî pêro pîya mekanê bimbarekî de venga heqî da û vat: “Ya Duzgin kam ke jîyar û dîyaranê ma ra çîyê xirabînîye ano, cayê xo hard û asmen de çin bo.”
‘Heq ma rindîye ra durî mekero’
Pîr û taliban pêrûne pîya mekanê Bimbarekî de cem zî da gire. Cem de ame dîyarkerdene ke, kesê ke yenê serê jîyar û dîyaranê ma de seba zernan fetelînê, îyê ke Mekanê Bimbarekî kenê xiravin, heq cîrê pers kero. Qomê ma ewro amey mekanê bimbarekî, jîyaranê xo ra wayîr vejînîme. Poşdî danîme jûminî. Heq ma rindîye ra durî mekero.”
