Sendîkayî, sazîyê sivîlî, partîyê sîyasî, û bi sedan kesê dêrsimijî Suka Hunerî de ameyî pêser û şî Meydanê Seyîd Rizayî. Bi slogananê “Ma kedkarê, heqdarê û serkewenîme” “Roje yena dewran agêreno û AKP hesap dana şarî,” “Bicuyo 1ê Gulane” ameyê eştene.
Hemşaradarê Dêrsimîyê ke bi destê qayumî vezîfeyê xo ra durî kewt bî; Bîrsen Orhan û Cevdet Konak, Parlamentera DEM Partî ya Dêrsimî Ayten Kordu, xeylî Sendîka, Komel û Sîyasetmedarî, welatîjî û karkerî amey pêser. Karkeranê Dêrsimi bi govende kaykerdiş, bi slogan eştene heta meydanê Sey Rizayî şî û dest bi mîtîngî kerd. Mîtîn de, azadîya Karkeran û aştîye ser qiseykerdîşî bî. Qomê Dêrsimî, ma re roje ewroyêne ser qisey kerd.
‘Heqe xo hatan merdene pers keme’
Nurî Balca qiseykerdîşe xo de wîna va: “Seba heqe xo ameyme, handayê karker seba nûnê xo, bîne hardî de gûrîno, mireno, kes cî rê wayîrîyen nê keno. Heqê înû bîderê. Poştî biderime jûmînî. Heqê xo hatan merdene pers bikeme.”
‘Piştîya karkeran ra payra vindenîme’
Fatma Tumel, qiseykerdîşê xo de wîna va: “Karker ke nêbî, halê ma sebeno? Heqê karkeran bîderê. Karker ke nêbî, îyê ke serê ma de rê geste ver mirenê. Xerê karkerano, înû ke çin bê, hêşîrîye bena zaf.”
‘Karkerê welatî teyna nîyê’
Nuray Vurale zî wîna va: “Vazenîme ke heqe karkeran bîdê ci. Karkeranê madenî paştî dê jûminî û heqa xo girewte. Ma perûne pîya, destê jûmînî bîcêrime.”
‘Peyser some raver nêsome’
Altun Kayaoglu, qiseykerdîşe xo de wîna va: “Welatê ma de karkerî feqîrê. Çiqas gurîna bigurîye vesanîye bena jêde. Raver şîyayîş çin o. Peyser some, raver nêsome. Xeyle xortê ma bê karê. Wenenê ûncaya ke kar nêvînenê. Dewlete mordemanê xo ceno kar.
‘Ewro roja ma yo’
Muzaffer Goktepe, roze ewroyen ser wîna vano: “Ewro seba heqê xo girewtene ameyme pêser. Ewro roja karkerena. Ameyme, poşt dame jûmînî. 1ê Gulane roja karkeran pîroz bo.”
