Meclîsê Cinîyanê Elewîyan ê Komela Demokratîke seba 8ê Adare sere Jîyara Ana Fatma de nîyaz kerd vila, çilayê vesnayî û gûlbang da. Cinîyan mîneta xo kerde û vengê Heqî da va: “Heq qomê marê, Cinîyan rê rindîye bîyaro.”
Meclîse Cinîyanê Elewîyan ê Komela Demokratîke seba 8ê Adare şî serê jîyara Ana Fatma. Cinîyan verî qirnefîlê destanê xo eştî awa Muzirî dima ra zî serê Jîyara Ana Fatma de gulbangî dayî û loqmeyî kerdî villa. Cinîyan çilayê Ana Fatma seba heqîqetê cinîyan û aştîye ser veşnayî. Dima ra zî eşkerayîye amê dayene. Çalekîye de Wekîla DEM Partîye Ayten Kordu û cinîyanê Dêrsimijan cî ca girewt.
‘Raya ma raya Raştîya’
Endama Meclîse Cinîyanê Elewîyan ê Komela Demokratîke Beser Develî sere nameyê cinîyan qiseykerd û wina va: “Raya ma, raya raştîya. Jîyara Ana Fatma Cinîkon rê roştîye ana. Mîyanê qomê ma de cayê cinîkon zaf muhimo. Kam ke tengîye de ro, kam ke heşîrîye vîneno, Ana Fatma cîre embaz bo. Ameyî me îta rindîye û aştîye ser çilayan veşnenîme.”
‘Teyna nîyîme, pîyarîme’
Beser Develî, qiseykerdîşe xo de poştî dayena cinîyan ser wina va: “Sûrîye de jû serre yo ke şarê Elewî qir kenê, cinîkonê Elewîyan qir kenê. Rojhelato Mîyanên de, her ca de ceng est o. Ceng de cinîk û domanî yenê kîştene. Ma Cinîkî vazeme ke aştîye bêro, rindîye bêro. Dinya de endî cinîkî vengê xo kenê berz vane ke, ma nêvazenîme ke sodîr heta san bigurîme, kiştena cinîyan nêvazenîme. Pîya vinderîme. Ma cinî, poştî bîderîme juminî, peyde mevinderîme. Ma weşîye vazenîme, rindîye vazenîme, wes bo 8 Marte. Cinîyanê dinya rê 8ê Adare Pîroz bo.”
