Kemal Kiliçdarogluyî Sirri Sureyya Onder zîyaret kerd. Kiliçdarogluyî vat goreyê zanayîşê ke doktoran ra ame girewtene demê hewnkerdişî yê Onderî 5 rojî ame dergkerdene. Derheqê prosesî de zî vat, “Tirkîya hewceyê çareserîye ya.”
Serekê Pêroyî yo verên ê CHP’yî Kemal Kiliçdarogluyî Endamê Heyetê Îmraliyî yê DEM Partî û Serekwekîlê Meclîsî Sirri Sureyya Onder nêweşxane de zîyaret kerd. Kiliçdarogluyî Hemserekanê Pêroyî yê DEM Partî Tuncer Bakirhan û Tulay Hatimogullari û doktoran de ame têhet, derheqê rewşa Onderî de zanayîş girewt û ci rê şîfa waşt.
Kiliçdaroglu vat: “Ma semedê Sirri Sureyya Onderî dûa kenê. O zaf yarûn o, ma pêro wîşnayêne. Merdimêko zaf hol û sîyasetmedar o zaf hol o. Ma hêvî kenê ke ma do derheqê ey de xeberanê zaf rindan bigîrê.”
Pêvînayîş de badê persayîşê reşwa Onderî proses zî gerîya dest. Tuncer Bakirhani vat, “Proseso zaf muhîm est o. Vengdayîşê Birêz Ocalanî semedê heme şaranê bindestan, cinîyan, karkeran û şaran o. Gerek pêro partîyê sîyasîyî paştî bidê prosesî. Merdimê sey ey semedê nê prosesî zaf muhîm ê. No proses têna mabênê DEM Partî û AKP’yî de nîyo. Eke wina bo ser nêkewno. Gerek pêro partî û rêxistine tewrê nê prosesî bibê.”
Kiliçdarogluyî zî bale ante muhîmîya prosesî ser û vat DEM Partî hol xebitîyaye û rolo muhîm kay kerd. Kiliçdarogluyî ard ziwan ke proses semedê Tirkîya zaf muhîm o, Tirkîya zî hewceyê çareserîye ya.
Endama TJA Sebahat Tuncele zî ard ziwan ke gerek her kes nê prosesî de rol bigîro û vat, “Nê prosesî de gerek her kes rolê xo kay bikero. Gerek qanûnê înfazî bêro bedilnayene û tepişteyê nêweşî û tepişteyê sîyasîyî bêrê veradayene. Gerek şima zî tewrê prosesî bibê.”
Badê pêvînayîşî Kiliçdarogluyî nêweşxane de eşkerayîya kilme daye. Kiliçdarogluyî ard ziwan ke her kes wazeno ke rewşa Onderî bibo hole û vat, “Goreyê zanayîşê ke ma doktoran ra girewtî demê hewnakerdişê Onderî 5 rojî ame dergkerdene. Ma hêvî kena ke Onder demê tewr kilmî de bibo rind.”
