Heyetêkê MHP’yî bi munasebetê roşanî ame DEM Partî zîyaret kerd. Pêvînayîşî de bale ant vengdayîşê Rayberê Şarê Kurdî Abdullah Ocalanî ser o û ame vatene ke vernîya Tirkîya de firsendêko tarixî est o.
Partîyê sîyasî roja 2. ya Roşanê Remezanî de seba pîrozkerdişê roşanî şîyê zîyaretê yewbînan. Heyetê Partîya Têduştî û Demokrasîyî ya Şaran (DEM Partîş) û MHP’yî reya ewil bi munasebetê roşanî yewbînan zîyaret kerd.
Heyetê MHP’yî ke seba zîyaretê roşanî ameyo, hetê Cagirê Hemserekê Pêroyî yê DEM Partî yê Berpirsîyarê Komîsyonê Hiqûq û Heqanê Merdiman Ozturk Turkdogan, Cagira Hemsereka Pêroyî ya Berpirsîyara Komîsyonê Şar û Bawerîyan Yuksel Mutlu û Parlamenterê Bêdlîsî Huseyîn Olan ra ame pêşwazîkerdene. Heyetê MHP’yî de zî Sekreterê Pêroyî yê MHP’yî û Parlamenterê Bursayî Îsmet Buyukataman, endamê Lijneya Rayberîya Merkezî (MYK) Esma Ozdaşli û Şahîn Kartal ca girewt.
Buyukataman silamdayîşî ra pey qisey kerd û vat ke CHP’yî ra vêşêr ma do şêrê heme partîyanê sîyasîyan zîyaret bikerê. Buyukataman vat ke ma do pîya rojê ke benê wesîleyê akerdişê beranê neweyan û xurtkerdişê hiqûqê birayîye biciwîyê.
‘Ma eşkenê Tirkîyayêka newa awan bikerê’
Ozturk Turkdogan zî dîyar kerd ke ê hêvî kenê ke heme kesê ke azadîya xo ra bêpar mendê, êdî bêrê veradeyene. Turkdogan dîyar kerd ke ganî her kes goreyê “Vengdayîşê Aştî û Komelo Demokratîk” têbigêro û Tirkîya bi aştîyêka birûmete newe ra bêra awankerdene. Turkdogan vat: “Ma wazenê Tirkîyaya ke îradeyê şarî rê rêz gêna, bêra awankerdene.
Yuksel Mutlu zî zîyaretî ra pey qisey kerd û vat ke roşanî de waştişê înan o tewr pîl o bî ke heme girewteyê sîyasî û embazê înan keyeyê xo reyde roşanê xo pîroz bikerdêne. Yuksel Mutlu vat: “Ez hêvî kena no zîyaret bibo wesîleyê nê. Demokratîkbîyayîşê sîyasetî mojneno ke hela komele rê no çend lazim o. Partîya ma vera tayînkerdişê qeyûm û verademokratîk a. Ganî tu kes riyê fikir û amancanê xo hepisxane de nêbo.
DEM Partî MHP’yî zîyaret kerd
Eyn saetan de heyetê DEM Partî şi Merkezê MHP’yî yo Peroyî zîyaret kerd. Verfeka DEM Partî Ayşegul Dogan, Parlamenterê Onur Duşunmez û endama Komîsyonê Şar û Bawerîyan Zeyno Bayramoglu heyetî de ca girewt. Heyet hetê Cagira Serekê MHP’yî yo Pêroyî Zuhal Topçu, Koordînatorê Dibistanê Sîyaset û Lîdertîye û endamê MYK’yî Turan Şahîn û endamê MYK’yî Ozmen Gîray Erdemîrî ra ame pêşwazîkerdene.
‘Ma firsendêko tarixî reyde rî bi rî yê’
Ayşegul Dogan zîyaretî de vat ke dîyalogê mabênê partîyanê de ke yewbînan ra cîya fikirîyenê, muhîm o. Ayşegul Dogan ard ziwna ke Tirkîya firsendêko tarixî reyde rî bi rî ya. “Vengdayîşê 27ê sibate ra pey seba nê firsendî çîyo ke keweno milê ma ser o, ma bikerê. Ganî ma heme menfeetanê sîyasîyan ra fek veradê. Seba ke ma behsê aştîya komelî û awankerdişê demokrasîyê Tirkîya kenê. Şar êdî riyê şerî ra rincan bîyo. Ganî tirkîya yewna seserre xo destî ra nêfîna. Seba Tirkîyayêka demokratîk, seypê, adîl û azad ganî tehlukeyê ke est ê, orte ra wedarîyê. Seba ke no dem demêko xetere yo zî. Coka ra vindertiş û îradeyê partîya şima û blokê îqtîdarî muhîm o. Edî vateyî ameyê vatene û nêbeno ke ê vateyî nêrê kerdene. Ganî bi lez bêrê caardene.”
‘Serdemêko muhîm o’
Zuhal Topçu zî nê çîyî vatî: “Ma dekewtê prosesêko muhîm. Înşela no proses dewam bikero. Bi rastî zî yo muhîm ameyoxê Tirkîya yo. Sey şima zî gama bîne ard ziwan şarê ma êdî rincan bîyo. Kuturêkê nê welatî est o. Ganî no reyna bêro gandarkerdene. Ganî na dewlete pîya rayîrî ra şêra ke serekê ma yo pêroyî gama ewile eşte. Boka nê stratejî ra pey çîyê weşî biqewimîyê.”
