DEM Partî programê xo yê 1ê Gulane ya Roja Karker û Kedkaran a Dinya eşkera kerd. DEM Partî programê xo de dîyar kerd ke ey do her ca de waran de bê û vera kedwerî, şer û kolonyalîstî vengdayîşê têkoşînê hempare kerd.
DEM Partî bi sloganê “Seba ked, Aştî û Edaletî ver bi 1ê Gulane” programê 1ê Gulane Roja Kerkar û Kedkaran a Dinya eşkera kerd. DEM Partî program de dîyar kerd ke vengdayîşê Aştî û Komelo Demokratîk, têkoşînê seba ked, têduştî, edalet, ekolojî û azadîya cinî rayîr mojneno ma û vera kedwerî, şer û kolonyalîstî vengdayîşê têkoşînê hempare kerd. DEM Partî do startê xebatanê 1ê Gulane ewro bido.
DEM Partî çarçewaya xebata 1ê Gulane de nê qerarî girewtê;
“*Heme xebatî do bi şîarê Seba ked, Aştî û Edaletî ver bi 1ê Gulane bêrê kerdene.
*Kurdîstan de Amed û Wan de mîtîngê merkezî do bêrê viraştene û şaristanê dorûverî zî do tewrê mîtîngî bibê.
*Tirkîya û Kurdîstan de do bi hêzanê kede û demokrasî reyde bi hawayêko hempar mîtîngî bêrê viraştene.
*Dewe bi dewe, taxe bi taxe û keye bi keye do xebate bêro kerdene.
*Awanîyanê şaristan û qezayan, dingan û kuçeyan de pankartî do bêrê aleqnayene
*Fabrîka, atolyeyê tekstîlî, şantîyeyî, ocaxê madenî û bazaran de standî do bêrê akerdene û seba vengdayîşê mîtîngan rayîrşîyayîşî do bêrê kerdene.
*Seba ke keda cinîyan bêro vînayene do Meclîsê Cinîyan reyde xebatê hemparî bêrê viraştene.
*Bi karkeranê ciwan, karkeranê gede û bêkaran reyde pêvînayîşî do berê kerdene.
*Do paştîdayena xoverdayîşê karkeran û grevan bêro kerdene.
*Seba têkoşînê pawitena Ekolojî û vera qirkerdişê xoza do xebatî bêrê averberdene.
*Medyaya dîjîtal û xebatê çapemenî do bi hawayêko çalak bêrê şuxulnayene.
