DEM Partî kongreya Çewligî viraşte. Çewlig de qiseykerdoxe Hemsereka Grûba DEM Partî Gulistan Kiliç Koçyiğit va, “Rêzdar Ocalan rojêk zî gamêk zî aştî ra û çareserîya demokratîke ya meseleya kurdî ra apey nêmend”.
Rêxistina Çewligî ya DEM Partî, kongreyaxo ya Asayî ya 2. salona konferansê şaredarîye de viraşte. Kongre de, Hemsereka Grûba DEM Partî Gulistan Kiliç Koçyiğit, Parlamenterê Çewligî Omer Faruk Hulaku û zaf endamê partî beşdar bîy. Salona ke kongre tede ame viraştene, pankartê nuşteyê “Ma şahîdê vengdayîşî yê dima şonê “, “Kede erjo tewr berz o” û “Jin, jiyan, azadî” ameyî daleqnayene.
Badê vindertişê hurmete, weçînayîşê dîwanî ame kerdene. Dimayê kongre de Hemsereka Grûba DEM Partî Gulistan Kiliç Koçyiğit qisey kerd û va Rojhelatê Mîyanênî de şerêko qilêrin ramîyeno. Gulistan Kiliç Koçyiğit nîşan da ke hêzê emperyalîst bi Şerê Dinya yê 3. şarî yewbînî rê danê kiştiş û wina dewam kerd: “Tay cayan de xebitîyayo zî. Rojhelatê Mîyanênî de şarî yew bi yew qirkerdişî ra vîyarenê. Şero ke 7ê teşrîna verêne de mabênê Îsraîl û Filîstînî de dest pêkerd, 45 hezar Xazayijan cuya xo vindî kerde. 45 hezar kesî çiman ver de qir kerdî. Ewro Surîye de rejîmo ke ci ra vanê HTS, qirkerdişê Elewîyan keno. Elewîyan sey Esadî vîneno, bê ke ferq biko, cinî, doman nêvano kişeno û heme dinya nê qirkerdişî temaşe kena. Kesê ke behsê însanîye kenê, behsê erjê unîversalî kenê, behsê cuya însanan kenê, ewro gonîya Elewîyan ser o cumleyêk zî nêvajenê.”
‘Rêzdar Ocalan aştî ra apey nêmendo’
Gulistan Kiliç Koçyiğit ard ziwan ke şerê ke Rojhelatê Mîyanênî de ramîyenê dewam kenê û Tirkîya nê şeran ra azade nîya, û Tirkîya eşkena bi girêdayîşanê tarîxîyan yê mabênê Kurdan û Tirkan, nê girdabê şerî ra bivejîyo. Kiliç Koçyiğit nîşan da ke kes o ke na rastîye dîyo Rayberê Şarê Kurd Abdullah Ocalan o û wina va: “Heme na rastîye, reyna zî odaya 26 metrekareyî de, hucre de, mabênê çar dêsan de bo zî, tewr baş Rêzdar Ocalan vîneno. Vîyarte ra hetanî ewro hem welat hem herême hem zî dinya tewr baş waneno, tewr baş analîz keno, eynî wext de seba ke problemî bêrê halkerdiş, çareserî pêşnîyaz keno. Biewnîyê her yew pêvînayîşê peyênan ra. Se va? Va ‘Erey mende’. Va ‘Problemê kurdî eşkîyayêne zaf rew çareser bibo’. Îfade kerd ke wazeno nê problemî çareser bikero.. Çi heyf ke her agirbestî ver de operasyon bîyo. Çi heyf ke her gama aştî ver de polîtîkayê qilêrinî bîyê. La heme nê zulman reyde heme nê neyînîyan reyde Rêzdar Ocalan tu roj tu game aştî ra û çareserîya demokratîke ya meseleya kurdî ra apey nêmend.” Gulistan Kiliç Koçyiğit tewr peynî dîyar ke Abdullah Ocalan seba azadîya şaran têkoşîn dano.
Dima Parlamenterê Çewligî Omer Faruk Hulakuyî qisey kerd û va ke mesajê tarîxî ra pey ê kewtê prosesêko tarîxî mîyan. Hulakuyî dîyar kerd ke nê prosesî de ganî her kes berpirsîyarîye bigîro û va: “Behsê demokratîkbîyayîşî beno. Eke demokratîkbîyayîş bêro no welat, her çî do ci reyde bêro. Seba ma no raşta zî beyannameyê seserr o, seba ma destpêk o. Rêzdar Ocalan vano demokratîkbîyayîş. Coka gereka ma heme wina baş nê prosesî biwanê.”
Badê qiseykerdişan weçînayîşî de Sedat Ormangoren û Neriman Bolkan bîy Hemserekê Şariştanê Çewligî.
