Komîsyonê Ziwan, Kultur û Hunerî yê DEM Partî bi munasebetê 21ê Sibate eşkerayîyêk pare kerd û wina vat: “Yew komelo ke ziwanê xo yê dayîke ra qut bîyo, tena yew ziwan nê; tehlûkeyê vîndîkerdişê tarîx, kultur, heqîqetê xo yê neteweyî û komelkî reyde zî têrî maneno.”
Komîsyonê Ziwan, Kultur û Hunerî yê DEM Partî bi wesîleya 21ê Sibate Roja Ziwanê Dayîke ya Dinya eşkerayîye pare kerd. Eşkerayîya DEM Partî wina ya:
“Azadîya ziwanî, stûnanê tewr bingeyênan ê estbîyayîşê şaran ra yew a. Coka heqê ziwanê dayîke ser o vera sîyasetê înkar, asîmîlasyon û tasfîyeyî têkoşîndayîş, her çî ra verî yew îcabêko nêvazbîyaye yê merdimbîyayîşî yo. Ziwanê dayîke; vîr, nasname û bingeyê estbîyayîşê azadî yê şaran o. Pawitişê nê heqî; şertêko nêvazbîyaye yê cuyêka komelkîya têduşte, azade û demokratîke yo. Yew komelo ke ziwanê xo yê dayîke ra qut bîyo, tena yew ziwan nê; tehlûkeyê vîndîkerdişê tarîx, kultur, heqîqetê xo yê neteweyî û komelkî reyde zî têrî maneno.
Tirkîya de ferasetê netewe-dewlete yo yewperest û wişk merkezî, zey vizêrî ewro zî vera estbîyayîşê ziwanî û kulturî yê şaran sîyasetanê xo yê înkar, asîmîlasyon û tasfîyeyî rameno. Rixmê heme têkoşînê komelkî û waştîşanê şarê Kurdî, sîyaset û pratîkê ke vera estbîyayîşê ey ê ziwanî û kulturî yenê ramitene, mîsalê nê yê tewr şênber î.
Tirkîya de netîceya sîyasetanê înkar û asîmîlasyonî de zaf ziwanê qedîmî resayê sînorê vîndîbîyayîşî û no tehlûke her ke şono zêdêr beno. Ubixkî û Yewnankîya Kapadokya bi temamî vîndî bîyê; lehçeya qedîme ya Kurdkî; Zazakî/Kirmanckî, Lazkî, Hemşinkî, Abazakî, Çerkeskî, Suryankî, Yunankîya Pontusî, Ermenkîya Rojawanî û Romankî zî binê tehdîtê vîndîbîyayîşêkê cîdîyî de rê.
Komelo demokratîk; yew cuya wina ya ke ferqîyîyetî tede nêyenê înkarkerdene, eksê ci azadane est ê. Azadîya ziwanî prensîbê bingeyên yê na cuye yo; derheqê ziwanê dayîke de heme heqî nêvazbîyaye yê. Aştîya komelkîye, bi ferzkerdişê yewperestîye nê; bi naskerdişê ziwanan, nasnameyan û kulturan ê sero bingeyê têduştîye û azadîye mumkun a.
Coka heqê musayîş, xebitnayîş, averberdiş û sey ziwanê perwerdeyî weçînayîşî yê ziwanê xo yê dayîke yê heme şaran ganî bîyero binê garantîye. Cuya gelemperî bi yew feraseto zafziwan û têduştîyabawer ganî newe ra bêra serûberkerdene. Yew aştîya adîle û komelo demokratîk tena yew zemîno ke ziwanî tede azad ê, de eşkenê bêrê awankerdene.
Sere de Birêz Abdullah Ocalan, bi xebatanê zaf derûdoran heta ewro yo ke arîyayo, çarçeweya prosesê Aştîye û Komelê Demokratîkî de, derheqê viraştişanê qanûnan ê ke do Meclîs de bêrê kerdene de, pawitiş û waştîşê şarê Kurdî û heme şaran zelal ê. Ferasetê hîyerarşîk, yewperest, teberkerdox, qedexeker û asîmîlasyonkarî ganî biqedîyê; huqûqê serdestan nê, huqûqê mîyanê têduştan ganî bêro ronayene. Mîyanê ziwanan de serdestîye nê aştîye; mîyanê nasnameyan de tahakkum nê têduştîye ganî bêra pêardene. Seba aştîya komelkîye, sere de perwerdeyê ziwanê dayîke, heqê ziwanî ganî bîyerê binê garantîye û biresê statuyêkê qanûnî.
Pawitişê azadîya ziwanan, awankerdişê azadîye û aştîya komelî yo.
Bi wesîleyê 21ê Sibate Roja Ziwanê Dayîke ya Dinya ma reyna bin xêz kenê: Azadîya ziwanî, bingeyê komelê demokratîkî û aştîya bi rûmet a. Coka ma her kesî dawetê berzkerdişê têkoşînê ziwanê dayîke kenê.
Heme Ziwanan rê Têduştîye û Azadîye!
Ziwanê Dayîke Estbîyayîş, Nasname û Rûmetê Ma yo.”
