DEM Partî beyanameyê netîceyî yê Kombîyayîşê Meclîsê Partî yê 11-12ê temmuze de ereynayîşê domdarî yê gamanê şênberan rexne kerd û tekîd kerd ke rayîrê demokratîkbîyayîşî gamanê sîyasî yê bicesaretan ra vîyareno.
Beyanameyê netîceyî de ame vatene: “Meclîsê Partîya ma averşîyayîşê sîyasî yê Tirkîya û herême, prosesê çareserîya demokratîke ya meseleya kurdan û polîtîkayê şerî yê mîyanneteweyî bi hewayêko pêroyî erjnayî. Bi naye, perspektîfê Konferansê Partî yê 22-23ê tebaxe û Kongreyê 5. yê 20ê êlule ame destgirewtene.
Tirkîya cayêko tewr krîtîk ê tarîxê komare de ya. Hetêk de firsendêko tarîxî est o ke eşkeno vernîya çareserîya demokratîke akero; hetê bînî de têgêrayîşêko otorîter yeno pêtkerdene ke huqûqî hacet keno û sîyasetê demokratîkî teng keno. Nê her di meylî nêeşkenê pîya dewam bikerê. Rayîrê haştîya domdare demokratîkbîyayîşî ra, rayîrê demokratîkbîyayîşî zî gamanê sîyasî yê bicesaretan ra vîyareno.
Ankara berpirsîyarîya xo ya tarîxî nêard ca
Merasîmê veşnayîşê çekan ê 11ê temmuze 2025î ke hetê Grûba Haştî û Komelê Demokratîkî ra ame caardene, noqtayanê tewr muhîman ê tarîxê nêzdî yê Tirkîya ra yew bî û komelî de hêvîyêka pête ya haştîye viraşte. La serrêk vîyarte, îqtîdarê sîyasî gamê demokratîk û huqûqî yê lazimî neeştî. Verdayîşê prosesî bê temînatê huqûqî û ereyfînayîşê domdarî yê tedbîranê demokratîkbîyayîşî, hîsê bawerîye yê komelî lerzneno.
Qanûnê çarçewa ganî teng û sînordar nêbo
Pê raporê komîsyonê TBMMyî ke bale ante hewcedarîya tedbîran ser o zî, aşmî vîyartî û qanûnê çarçewa nêame amadekerdene. Qanûno ke do bêro amadekerdene, ganî tena tedbîranê tengan ra îbaret nêbo: ganî prosesê bêçekbîyayîşî, agêrayîşê biemnîyet û birûmetî, beşdarbîyayîşê sîyasî yê demokratîkî û temînatê heq û azadîyanê bingeyînan yewbînan reyde bigîro xo dest, cîyakerdişanê kategorîkan nevirazo û bibo qanûnêko pêroyî.
Ganî şert û mercê xebata Abdullah Ocalanî bêrê temînkerdene
Seba ke proses aver şêro, ganî şert û mercê ke Birêz Abdullah Ocalan sey sermuzakerekar bi hewayêko bitesîr bixebitîyo û têkilî rono bilezabez bêrê temînkerdene. Tecrîdo ke nêzdîyê 50 rojan o dewam keno û parenêkerdişê verkarê qanûnî bi muxataban reyde, hewcedarîyanê prosesî reyde qet pê nêgêno.
Prosesê Haştîye sernameyêko teng ê emnîyetî nîyo
Prosesê haştîye tena qedîyayîşê pêkewtişan nîyo. Haştîyêka domdare û birûmete hewce kena ke heme mekanîzmayê vesayetî hewanîyê, rejîmê qayûman biqedîyo, mudaxeleyê îradeyê weçînayeyî ser o biqedîyê, azadîya îfade û rêxistinbîyayîşî bigîrîyo binê temînatî, sere de ziwanê dayîke heqêko bingeyîn bêrê naskerdene û prensîbê hemwelatîtîya seypêye heme waranê cuye de bêro caardene.
Demo ke ma tede yê, tena demê şeran nîyo; xirabkerdişê ekolojîkî zî giran benê. Xoza, waranê cuye û estbîyayîşê ma yê hemparî rîyê projeyanê girsan ê enerjî, made û awanîyan ra yenê rijnayene. Coka ganî xetêka pête ya xoverdayîşê komelkî bêra awankerdene ke edaletê îqlîmî, pawitişê xoza, haştî û demokrasî zemînêko hemparî yê têkoşînî de bîyaro têhet.
Sîstemê kapîtalîstî yê camêrdserdestî şer, otorîterbîyayîş, feqîrîye, dişmenîya cinîyan û polîtîkaya nefretî ya vera LGBTÎ+ newe ra ber anê. Cuyêka demokratîke, azade û seypêye bê temsîlê seypê, têkoşînê rêxistinkerdeyî û îradeyê ronayoxî yê cinîyan mumkun nîya.
Zîrweyê NATOyî û çimeyê ke çekan rê ameyî cîyakerdene
Zîrweyê NATOyî yê 7-8ê temmuze ke Ankara de ame kerdene, reyna mojna ke sîstemê mîyanneteweyî ser o ekseno mîlîtarîst newe ra yeno şekildayene. Hedefê berzkerdişê xercê pawitişî heta se ra 5ê ameyeyê mîlî tena weçînayîşêko leşkerî nîyo; yeno a mana ke çimeyê ke ganî perwerde, weşî, emnîyetê sosyal û citekarî rê bêrê cîyakerdene, ekonomîya şerî rê yenê şawitene. Bi mîlyonan kedkarî sînorê veyşanî û feqîrîye de yê; qebul nêbeno ke çimeyê pêroyî polîtîkayanê şerî rê bêrê cîyakerdene. Bacê şarî ganî çekdarbîyayîşî rê ney, perwerde, weşî, keye, îstîxdam û edaletê sosyalî rê bêro cîyakerdene.
Rîyêko bîn ê Zîrweyê NATOyî zî polîtîkayê zordarîye bî: verê zîrwe û demê zîrweyî de sere de Ankara gelek bajaran de operasyonê vera sosyalîst, rojnameger, sendîkager, rêxistinê ciwanan û hêzanê demokrasî ameyî kerdene; gelek kesî ameyî destbendkerdene û tepîştene. Heqê kombîyayîş û rayîrşîyayîşê nawitişî bi hewayêko fîlî ame hewanayene. Hewanayîşê heq û azadîyanê demokratîkan bi tu bahaneyê emnîyetî nêbeno meşrû.
Berpirsîyarîya tarîxî ya DEM Partî zêdîyaye. Demê vernîya ma de, demêko newe yê têkoşînî yo. Konferansê Partî û Kongreyê ma yo 5. do têkoşînê demokrasî, haştî û azadîya komelkî ya Tirkîya rê rayîrêko newe û pêt bido. Ma bawer kenê ke ameyox ewro ra yeno awankerdene; ma nê rayîrşîyayîşê tarîxî şaranê xo reyde mil bi mil pîya pêt kenê.
Hêvî ma de ya, îrade ma de yo, ameyox ma de yo.”
