Sereyê qetilkerdişê rojnameger-nuştox Musa Anterî ra 33 serrî vîyart. Serrgêra qetilkerdişê Musa Antserî ser o DBP’î beyanato nuştekî weşan kerd. DBP’î va ke: “Ma do hertim wayîrê zelalkerdişê heqîqete bivejîyê û vengê raştîye her ware de bidê hesnayene.”
Sereyê qetilkerdişê rojnameger-nuştox Musa Anterî ra 33 serrî vîyart. Rayberê Şarê Kurdî Abdullah Ocalanî ey rê vatbi: “Yew welatperwero raştikên bi. Coka hetê kontrayan ra ame qetilkerdiş. Bi sereyê xo sey yew partîye têgerîya. Partîye awan nêkerdbî, la rayîrê edebîyatî ra kurdan rê tayê çîyî vatbî. No zaf ercîyaye yo.” Qatilê Anterî hewna eşkera nêbîyê, la dosyayê dewaya ci kewt berê demvîyartişî.
Serrgêra qetilkerdişê Musa Anterî ser o DBP’î beyanato nuştekî weşan kerd.
Beyanat wina yo:
“Serrgêra 33yî yê qetilkerdişê roşnvîr û rojnamegero qedirberz Apê Musa de, ma ey bi rêzdarî, hezkerdiş û minet anê xo vîrî.
Apê Musa nê têna roşnvîr û rojnamegerêko qedrberz bî, o heman dem de serkêşê çapemenîya azad a Kurdîstanî bî. Bi qelema xo ya hêzdare, bi vatişanê xo yê raştîye o bî vengê şarê kurdî. Eynî wext seba pawitişê estîye û xobîyayîşê şarê kurdî awankerdişê sazgehanê ziwan, kultur û hunerî de serkêşîye kerde, xeylêk rojname û kovaran de rewşa şarê kurdî ser o nuşteyî nuştî û sîyaset de ca girewt.
Serranê 1990an de, demo ke Kurdîstan de polîtîkayê îmha, înkar û asîmîlasyonî ameyî caardene, Apê Musa xirtane raştîyê ke dewleta tirke waşt dinya ra binimo, peyda kerdî û heta peynîya cuya xo rêça raştîye ra nêvejîya. Nê semedî ra 20ê êlula 1992yî de Amed de bi destê kiştoxanê dewlete ame qetilkerdene. Armancê înan o bî ke qelema Apê Musayî bişiknê û vengê raştîye bibirnê, la ê caro nêresayî armancê xo. Taqîpkerê Apê Musayî, generalê ey yê qijî, rojnamegeranê çapemenîya azad a kurde, qelema ey erd de nêverdaye û çar leteyê Kurdîstanî û dinya de vengê raştîya şarê kurdî û heme bindestan berz kerd.
Bi na wesîle ma şexsê Apê Musayî de pêro şehîdanê ke raya raştîye de cuya xo bedilnaye, bi rêzdarî, hezkerdiş û minet anê xo vîrî. Sey DBP ma do hertim wayîrê zelalkerdişê heqîqete bivejîyê û vengê raştîye her ware de bidê hesnayene.
Partîya Herêmanê Demokratîkan”
