Dayîkê ke tewrê çalakîya Komela Cigêrayîşê Kultur û Ziwanî ya Avesta bîyê, waşt ke ziwanê kurdkî bibo ziwanê fermî û perwerdeyî.
Komela Cigêrayîşê Kultur û Ziwanî ya Avesta semedê ke ziwanê kurdkî bibo ziwanê fermî û zextê ke ziwan û kulturê kurdan ser o yê, biqedîyê, vernîya banê komele de eşkerayîyêke daye çapemenîye. Mayanê ke tewrê eşkerayîye bîyê, dima ra waştişê xo yê seba ziwanî ardê ziwan.
‘Wa domanê ma wendegehan de bi kurdkî perwerde bivînê’
Hemsereka Komela Cigêrayîşê Kultur û Ziwanî ya Avesta, Kurdîye Irgat babete ser o qisey kerde û va: “Ziwan heqê merdimîye yo. Key ke merdim yeno dinya, bi ziwanê maya xo yeno dinya. Zê pêro ziwanan, ziwanê kurdkî zî fîraz o.”
Kurdîye Irgat bal ante ser înkar û zextanê ziwanê kurdkî û wina dewam kerd: “Domanê kurdan û keyeyî bi xo zî nêeşkenê bi rehetî û azadîye ziwanê xo qisey bikerê û wina va: “Ma xîret kenê ke dersan bidê keyeyan û domanan. La reyna zî bes nîyo. Ma wazenê wa ziwanê kurdkî wayîrê statuyî bibo û bibo ziwano fermî. Ma wazenê ke domanê ma destpêkê seretayî ra hetanî peynî bi ziwanê xo biwanê.”
Aktîvîsta TJA Emîne Bozdag zî da zanayene ke heqê şarê kurdî yo û hewcedarîyêka pîl a ke ziwanê kurdkî bibo ziwano fermî û va: “Ez zî zê pêro domanê kurdan, key ke mi wendegeh de kurdkî qisey kerd, mi dayo piro. No pirodayîşê ke mi seba qiseykerdişê ziwanê xo werd, zerrîya mi de bîyo kul û keder. Ez nêwazena domanê mi wina pîl bibê. Dibistano verênî ra bigêre hetanî zanîngehî her warî de ez wazena ziwanê kurdkî bibo ziwanê fermî.”
Emîne Bozdage seba akerdişê Avesta zî va: “Na sazî seba ma destkewtişêko pîl o û ma wazenê ke domanê ma bêrê tîya.”
‘Ganî domanê ma şirê sazîyanê kurdkî û ziwan bimusê’
Peynî de Dayîke Siltan zî ciwanê kurdan rexne kerdî û va: “Hewl o ke merdim her di ziwanan bizano. La çira ez zaf reyan vînena ke ciwanê ma nêeşkenê kurdkî qisey bikerê. Çira nêzanenê qisey bikerê? Wa ziwanê xo bimusê. Ziwanê ma rûmetê ma yo. Ez wazena domanê ma şirê sazîyanê ma û kurdkî bimusê.”
