Vewre zafe ke 4 rojî yo Colemêrg û qezayanê ci de varena, 7 aşîtî rayîrê Colemêrg û Wan û Colemêrg û Şirnexî de qewimîyayê. Ame parekerdene ke Colemêrg de rayîrê 110 dewe û 247 mezrayan ameyê girewtene.
Colemêrg û qezayanê ci de vewra ke 4 rojî yo bêmabên varena, cuya rojane ya merdiman zehmet kena. Berzîya vewre ya tayê cayan resaya metreyêk û xeylê cayanê de zî aşîtî qewimîyayê. Rayê Colemêrg û Wan û Colemêrg û Şirnexî zî riyê aşîtan ra bi pêroyî seba trafîkî ameyê girewtene. 3 aşîtî rayîrê Colemêrg û Wan de û 4 aşîtî zî rayîrê Colemêrg û Şirnexî de qewimîyayê. Riyê xebata xirabe ya Mudirîyetê Rayîranê Bejayî û şaredarîya ke binê îdareyê qeyûmî de ya pêroyê Colemêrgî de rayîrê 110 dewe û 247 mezrayan ameyê girewtene.
Merkezê şaristanî de zî seba ke di rojî yo xebatê pakkerdişê vewre nêameyê kerdene, welatijî zehmetîyan ancenê.
