Cinîyê suveydayij Sûrîye de hadrekerdişê mekaqanûnê neweyî de cagirewtişê cinîye ra bal antê ser û dîyar kerdê ke ganî mekaqanûno newe de seyî ra 50î do kotaya cinîyan biba.
Meclîsê Cinî yê Sûrîye-Suveyda, 9ê Çele paytaxta Şamî ya Sûrîye de seba problemê cinîyan û rol û mîsyonê cinîyan ê sîyasî û komelkî ser o kombîyayişêk viraşt. Kombîyayiş de hêzkerdişê cinîyan ser o pêşnîyazan ame barkerdiş.
Endama Hareketa Cinî ya Suveyda Ghada Al-Shaaranî bal ant muhîmîya kombîyayişî û wina va: “Ez zî beşdarê kombîyayişî bîya. Ma waşt ke wa mekaqanûno newe de kotaya cinîyan seyî 50î ra kêm nêbo. Pêvajoya krîzê Sûrîyeye de cinîyan xo nîşan dayê û awankerdişê Sûrîyeya demokratîke ser o zî xebityenê.”
Wa cinîyan mekanîzmayê qerarî de ca bigê
Pawitoxa Heqî û Sîyasetmedar Basma El Akbanî aşkera kerd ke seba heme cinîyê Sûrîye de lazimeya mekaqanûnê pêrabesteyî est o û no ser mekaqanûn bêro bedilnayiş.
Endama Hareketa Cinîye ya Sîyasî Nîssan Bablî zî dîyar kerd ke ê nê 14 serrê ke xebityenê ke partîyê sîyasî de cinîyan hîna bi qewetir bikê û wina qedîna: “Hadrekerdişê mekaqanûnê neweyî zaf bi muhîm o. Konferansê Dîyalogî yê Neteweyî bêro viraştiş û ma zî sey cinîye do tewro kêm seyî ra 30î do beşdarê konferansî bibê.”
