Çalakîyê Rojhelatê Kurdîstan û Îranî roja 10. de dewam kenê. Hêzê rejîmî bi girewtiş û kiştişî hewl danê çalakîyan bivindarnê. Ame eşkerakerdene ke mîyan 10 rojan de hezar û 203 kesî ameyê destbendkerdene, ewr kêm 29 çalakîkerî ameyê kiştene û 64 çalakîkerî zî birîndar bîyê.
Çalakîyê ke 28ê kanûna 2025î de pêroyê Îran û Rojhelatê Kurdîstanî de vera krîzê aborî, problemê sîyasî û komelkî dest pêkerdê, dewam kenê. Rimxo ke rejîmê Îranî bi şeklêko xirab hêrişê çalakîkeran keno zî her ke şono çalakîyî hîra benê.
Goreyê vîdeoyanê ke toranê medya dîjîtale ser o ameyê parekerdene, roja 10. ya çalakîyan de zî hêzê rejîmî bi şeklêko xirab hêrişê çalakîkeran kenê. Kesê ke çalakîyan de birîndar benê, tersê nêweşxane de destbendkerdişî ra nêeşkenê şêrê nêweşxaneyan de derman bibê.
Çalakîyê şaranê Îranî 257 qeza, 88 şaristanok û 27 şaristananê Rojhelatê Kurdîstan û Îranî vila bîyê. Heta nika 17 unîversîteyî seba paştî beşdarê çalakîyan bîyê.
Heto bîn ra medyaya nêzdîyê îqtîdarê Îranî dest bi vilakerdişê vîdeoyê “îtîrafê çalakîkeran” kerdo. La nêyeno zanayene ke ê çalakîkerê binê çi şert û mercan de îfadeyê înan yeno girewtene û vilakerdene.
Hetê rêxsitinanê heqanê merdiman, sazgehê çapemenî yê Rojhelatê Kurdîstan û Îranî ra zî vîdeoyê cîya destbendkerdiş, kiştiş û birîndarkerdişê çalakîkeran vila benê.
Goreyê vîdeo û fotografanê Ajansê Xeberan ê Çalakîkeranê Heqanê Merdiman ê Îranî (HRNA) mîyanê 10 rojan de tewr kêm hezar û 203 çalakîkerê ameyê destbendkerdene, sewbîna tewr kêm 29 çalakîker ameyê kiştene û 64 çalakîker zî birîndar ê.
