Fîlîz Gul dîyar kerd ke çadirêke de 50 kesî mendê, werdê xo teber de viraştê, semedo ke ceyran çinbîyo bi lambeyan îdare kerdê û semedo ke çadire qije bîya, bi nobedarî mendê.
Erdlerzê 6ê sibate ke rijyayîşêk pîl vejîya werte, di serrî derbaz bî. Bi hezaran kesî erdlerz de dinyaya xo bedelnayî û bi hezaran awanî rijyayî. Yew bajaro ke tewr zêde bi bandor bi, Hatay bi. Hema rêça erdlerzî uca de est a. Problemê pîlî yenê ciwîyayîş. Merdimî hema çadire û konteyniran de ciwîyenê. Her cayê bajarî lêşin û herra.
Goreyê xebera Jinnewsî Fîlîz Gul dîyar kerd ke dejê erdlerzî hema taze yo û çîyê ke pey erdlerzî cuyayê qal kerd.
‘Ma cemidyenê û tersenê’
Fîlîz Gul dîyar kerd ke dejê înan roja ewilî ra taze yo û vat: “Erdlerz zaf bi şîdet bi. Her ke şi zêdeyêr bi. Her cayî ra veng ameyîne. Vengê rijyayîşî ameyîne. Ez şîya verê tutanê xo mi înan ko kerd. Dêsan ra tuxla kewtêne, kewtêne sereyê ma ro. Sereyê ma şikiyabî û gonî ameyîne. Erdlerz vindert ma vejîyayî teber. Awanîya ma 7 qatî bî. Ma qatê hîrêne de bî. Her ca tarî bî. Ma rewşa bajarî nêzanayîne. Mi vat qey ê ma tenê wina bîyo. Gama ke teber roşn bî ma dî ke her ca wina bîyo. Ma va, ma şêrê dewe. La ma nêeşkayî. Semedo ke pêro rayîrî padaye bî. Rayîrê dewe 15 deqe bî la ma 2 saete û nîm de şîyî. Ma cemidyayî, tersayîne.”
‘Ma bi dore derbazê çadire bîne’
Fîlîz Gul wina dewam kerd: “Şertê hewayî xeylêk xirab bî. Ma pêro nêeşkayîne ci de bimanê. Ma sobayêke kerd çadire. Ma dorê çadire bi batanî pada. Ma wina serd asteng kerd. Ceyran çinbî. Ma bi lambeyan îdare kerdêne. Ma banyoke viraşt. Ma firaqan teber de şûtêne. Xeylêk zehmet bî. Ma 8 aşmî çadire de mendî. Ma 50 kesî bî. Ca çinbî. Ma bi dore çadire de mendêne. Ma bi hemkarî pîya nê prosesê zehmetî derbaz kerd. Yewbîyayîşê şarî xeylêk çî ma rê da qezenckerdiş.”
‘Kes wayîrê Hatayî nêvejîya’
Fîlîz Gul da zanayîş ke kes wayîrê Hatayî nêvejîya û wina vat: “Vernîya erdlerzî zî kes wayîrê Hatayî nêvejîya. Hatay bi hewldayîşê xo bajarê xo lingan ser girewt. Tu paştdayîş semedê Hatayî çinbî. Ma şarê xo dir lingan ser o mendî. Ma erdlerzî de zî paştdayîşêk nêvîna. Nika zî ma nêvînenê.”
