Serekê Odaya Tabîban a Amedî Veysî Ulgen û Hemserekê Şûbeya SES’î ya Amedî Nazmî Çetînkayayî vat ke butçeya weşîye ya 2027î goreyê hewceyîyanê şarî amade nêbena.
Vakurê Kurdîstan û Tirkîya de problemê ekonomîk ra pey problemo tewr gird problemê weşîye yo. Wexto ke butçeya 2027î yena amadekerdene sazgehê weşîye wazenê ke butçe goreyê hewceyîyanê raştikênan bêra amadekerdene. Veysî Ulgen û Nazmî Çetînkayayî derheqê butçeya Wezareta Weşîye ya 2027î de ajansê ma rê qisey kerd.
‘Wexto ke butçe virazenê fikrê ma nêgênê’
Nazmî Çetînkayayî vat ke desthilatdar butçe goreyê şarî ney, goreyê xo amade keno û wina dewam kerd: “Butçeya 2027î de seba weşîye, kedkaran û şarî kêmanîyê girdî est ê. Ma waştêne waştiş û pêşnîyazanê xo meclîsî rê pêşkêş bikerê la pêşnîyazê ma nêameyî waştene.”

‘Amed de yew hemşîre miqateyê 550 kesan bena, Anqara de 350 kesan’
Nazmî Çetînkayayî bale ante ferqê weşîye yê mabênê şaristananê Vakurê Kurdîstanî û Tirkîya ser o û vat: “Goreyê rojawanê Tirkîya herêma ma nê warî de peyser menda. Hem awankerdişê sazgehanê weşîye de hem zî hûmara xebatkaranê weşîye de kêmanîyê girdî est ê. Nimûne, Amed de yew hemşîre miqateyê 550 nêweşan bena, la Ankara û Bursa de yew hemşîre miqateyê 350 nêweşan bena. Eke embazê ma tîya de binê zehmetîyanê girdan de xizmet bidê şar zî nêşkeno xizmetêko rind ê weşîye bigîro.”
‘Xizmetê weşîye bi hawayê bazirganîye nêyeno dayene’
Veysî Ulgenî vat ke sîstemê weşîye yê 20 serranê peyênan weşîye ver bi xirabîye berda û wina dewam kerd: “20 serran ra zêde yo ke weşîye bîya bazirganî. Nêweşî zaf ê, nêşênê randevû bigîrê, verê berê nêweşxaneyan de rêzê dergî benê. Weşîye çîyêkê bazirganîye nîya; weşîye heqo bingeyin o, ganî bêpere bo û wezîfeyo verên ê dewlete yo ke naye bîyaro ca.”

‘Seba heqê xo ma do vejîyê meydanan’
Veysî Ulgenî ard ziwan ke kedkarê weşîye binê şert û mercanê giranan ê ekonomîkan de xebitîyenê û vat: meaşî bes nêkenê. Tayê kedkarî hîrê cayan de xebitîyenê, pêro deyndar ê. Seba heqanê kedkaran 12ê kanûne de ma do Ankara de butçe ser o mîtîngêk organîze bikerê. Ma venga herkesî danê ke beşdarê nê mîtîngî bibê.”











