Hemserekê DEM Partî Tuncer Bakirhan kombîyayîşê Meclîsê Partî de qisey kerd û vat: “Babeta esase çareserîya demokratîke ya meseleya kurdan û îradeyê wedarnayîşê astengîyanê verê çareserîye yo.”
Meclîsê Partî yê DEM Partî merkezê xo de kom bi. Hemserekê DEM Partî Tuncer Bakirhanî kombîyayîşî ra verî qisey kerd.
Bakirhanî vist vîrî ke rixmê qerarê Mehkemaya Heqanê Merdiman a Ewropa (MHME) zî Selahattîn Demîrtaş vera nêdîyeno û vat: “Mehkemaya Tirkîya sûc kena. Nê prosesî de ganî embazê ma yê girewteyî verabidîyê ke averberdişê prosesî rê kede bidê.”
Bakirhanî bale ant 3 aşman de 100 ra zafêr qetilkerdişê cinîyan ser o û vat: “Ma do sey DEM Partî vera nê cînayetan paştî bidê têkoşînê cinîyan û tim hetê înan de vinderê.”
Bakirhanî qirkerdişê vera durzîyanê Suwêda şermezar kerd û vat: “Pêro şar, bawerî û nasnameyî eşkenê bi fikrê Entegrasyonê Demokratîkî pîya biciwîyê. Ganî hukmatê Sûrîye polîtîkayanê tekperestan ra, înkar û asîmîlasyonî ra fek vera bido. Komelo demokratîk komara demokratîke ya.”
Bakirhanî da zanayene ke do çarçewa prosesê Aştî û Komelê Demokratîkî de Meclîs de komîsyonêk bêro awankerdene û vat: “Komîsyon ganî goreyê îhtîyacanê prosesî têbigêro, wina bikero ke netîce bigêro û zelal bibo. Birêz Ocalanî seba çareserî heta nika zaf gamî eştî. Ganî dewlete û hukmat bi lezî cewab bidê nê gaman. Komîsyon zî ganî tena seba verdayîşê çekan tênêgêro. Proses tena çekverdayîşî ra nêno pê. Proses seba çareserîya meseleya kurdan o.
Babeta esase çareserîya demokratîke ya meseleya kurdan û îradeyê wedarnayîşê astengîyanê verê çareserîye yo. No komîsyon eşkeno modelê aştîya Tirkîya biaferno.
Hetê bînî ra tayê terefî kenê ke prosesî bi provakasyonan çin bikerê. Seba ney hêrişê vera DEM Partî zî kenê. Ganî dezgehê hukmkerdişî goş nêdê nînan û Torosanê sipîyan ra bêrê war. Wa dişmenîya vera kurdkî bêra cezakerdene. Wa her kes hedê xo bizano. Ma sey DEM Partî kenê ke pêro şar, netewe, bawerî û kulturî bieşkê pîya biciwîyê.
Ma hêvî kenê ke pêro partîyê sîyasîyî paştî bidê prosesî û bi mesuldarî seba çareserîye wezîfeyanê xo bîyarê ca.”
