Hemserekê Pêroyî yê DBP’yî Keskîn Bayindir kongreya DBP’yî ya Şirnex de qisey kerd û vat ke proseso ke ameyo destpêkerdene, eşkeno bi rêxistinbîyayîş û yewîyêka zereyî û şaranê bînan reyde bireso amancê xo.
Partîya Herêman a Demokratîke (DBP) ya Şaristanê Şirnexî Kongreya xo ya Asayî ya 2. bi beşdarîya Hemserekê Pêroyî yê DBP’yî Keskîn Bayindir ameye kerdene. Kongre otêlêkê şaristanî de ameye kerdene. Parlamenterê DEM Partî Newroz Uysal Aslan û Mehmet Zekî Îrmez, rayber û endamê DEM Partî û DBP’yî yê Şirnexî û qezayanê ci, endam û rayberê sazgehanê komelê sîvîl û bi seyan welatijî beşdarê kongre bîyê. Weçînitişê dîwanî ra pey seba cangorîyanê têkoşînê azadîye deqeyêk rêze ameye girewtene.
Rêzgirewtişî ra pey Hemserekê DBP’yî Keskîn Bayindir qisey kerd û vat do bi rêxistinbîyayîşî prosesî biresnê serkewtişî.
‘Prosesî barêko giran dayo milanê ma ser o’
Bayindirî vateyê Rayberê Şarê Kurdî Abdullah Ocalanî ardê vîr û qiseykerdişê xo wina domna: “Birêz Ocalan vano no proses barêk dano milanê ma ser o, seba ke azadîya xo dest nêvista, azadîye vernîya ma de ya, paweyê ma ya ke ma destê xo derg bikerê. Nê semedî ra ganî ma rêxistinbîyayîşê xo bîyarê ca. No bar ewro milanê ma pêrûnan ser o yo. Seba ke no proses serkewo reyna tifaq bêro kerdene. Tifaqo ewil ganî şaranê bînan reyde bêro kerdene û tifaqo dîyin tifaqo zereyîn o.”
‘No proses bi xoverdayîş dest pêkerd, do bi xoverdayîş serkewo’
Bayindirî da zanayene ke seba serkewtişê prosesî xebatêka zaf lazim a û wina vat: “Ganî nasnameyê kurdbîyayîşî û nasnameyê Kurdîstanî ma bixebitîyê ke tifaqê kurdan bîyarê ca. Demêko derg o xebatê ma yê seba tifaqî dewam kenê. Ewro ma Kurdîstan de heme partîyanê xo reyde resayî astêk û ganî seba yewî bêrê tehet û ganî Kongreya Yewîya Neteweyî ya Kurdîstanî bêra kerdene. No proses bi xoverdayîşê şarê kurdî û têgêrayîşê ey dest pêkerd û do bi xebat û xoverdayîşê ma serkewo.”
‘Vengdayîşê Ocalanî, vengdayîşê Xanî, Şêx Seîd, Seyîd Riza û Barzanî yo’
Bayindirî dîyar kerd ke vengdayîşê Ocalanî xeyelanê têkoşêrê se serrî yo û qiseykerdişê xo wina qedîna: “Vengdayîşê Rayberê Şarê Kurdî, vengdayîşê Ehmedê Xanî, vengdayîşê Şêx Seîd o, vengdayîşê Seyîd Riza yo, vengdayîşê Mele Misfeta Barzanî yo, ma paştîya xo danê di sey serranê peyênan, ma paştîya xo danê têkoşînê sed serranê peyênan û ma paştîya xo danê 52 serranê peyênan yê ciwan û şarê kurdî. Ewro zî dişmentî dewan kena, Cûdî, Gabar û Besta bi talanê xoza dişmentî kenê. La no seba ma astengî nîyo. Seba ke na dişmentîya înan ra pîlêr ê û bi xoverdayîşê xo ma do heme astengîyan bişiknê. Ewro ra pey eke ma cuyêk biciwîyê, a cuye do bi azadîye û aştîyêk bi rûmet ba. Eke wina nêbo ma do cuyêka bêrûmete qebul nêkerê.”
Qiseykerdişê Bayindirî ra pey raporê xebata û aborî ameyê wendene.
Pê yew lîste kongre ameye kerdene û seba hemserekîya DBP’yî ya şaristanî Pinar Akil û Îbrahîm Sakur ameyê weçînitene. Kongre bi girewtişê govende qedîyaye.
