Hemserekê Konseya Rayraberdişî ya KCKyî Cemîl Bayikî vat ke seba averşîyayîşê Prosesê Haştî û Komelê Demokratîkî ganî ê zîyaretê Îmraliyî bikerê: “Heta ke Rayber Apo bi fîzîkî azad nêbo, qanûnê dewlete nêyeno ca.”
Bayikî programê Hevpeyvînî yê NÛÇE TVyî de vat ke qanûnê ke Meclîsî ra vejîya goreyê waştişanê înan nîyo, dewleta tirke o goreyê menfeetanê xo vet û amancê ci yo bingeyin bêçekkerdiş û vilakerdişê gerîla yo: “Mabênê ma û dewleta tirke de nê qanûnî ser o têkoşînêk est o. Seba ma çîyo muhîm temînkerdişê şertan o ke Rayber Apo nê prosesî birameyo û bireso serkewtişî. Nê qanûnî de esasê çareserîya meseleya kurdan çin ê; Rayber Apo wazeno meseleya kurdan masa de bêro çareserkerdene. Eşkerayîyê Bahçelîyî seba fermîbîyayîşê mesele muhîm bî. Heta ke Rayber Apo azad nêbo, qanûnê dewlete nêyeno ca; zemînê ci est o û wextê ci ameyo. Eke Rayber Apo azad nêbo, ma çekan nêronanê û nêşinê Tirkîya. Eke ma çekan ronê, ganî heqê ma yê fealîyetê sîyasî bibo û qanûnî bivurîyê.”
Rojnameger, şêwirmend, sîyasetmedar û akademîsyenî do şêrê Îmrali
Bayikî vat ke Rayber Apo bê înan tu game nêerzeno; bi rayîrê heyetê DEM Partî mesajî yenê şawitene û girewtene, la têkilîya rasteraste çin a û badê qanûnî ganî têhetameyîşî bibê: “Rojnameger û şêwirmendî do şêrê Îmrali; ganî tayê sîyasetmedar û akademîsyenî zî şêrê. KCK zî ganî zîyaretê Îmraliyî bikero, ma zî şinê. No seba Tirkîya lazim o, çike rewşa dewleta tirke baş nîya. Tedeyîyê qanûnî prosesî taloq keno û bi giranîya Tirkîya ya gameştişî îhtîmalê dergbîyayîşê prosesî yê serrêka bîne est o.” Ey ard ziwan ke waştişê înan eşkera yê: kurdî wazenê bi nasname, ziwan û kulturê xo erdê xo ser o bi azadî biciwîyê, ê nêwazenê Tirkîya parçe bikerê; ganî heqê kurdan Qanûnê Esasî de ca bigîrê, tepişteyê sîyasî bêrê veradayene û hepisxaneyî bêrê tehlîyekerdene: “Ma aşiqê çekan nîyê; ma seba pawitişê şarê xo çekdar bîyî. Ma reyna şer nêwazenê, la garantî wazenê. PKK sey rêxistin ameya fesihkerdene, la ruhê aye nêwedarîyayo. 50 serran de ma xeletîyî kerdî û ma têkoşîn ra fek nêverdayo.”
Ganî her kes destkewteyanê Başûrî bipawo
Bayikî vat ke seba yewîya kurdan firsendêko tarîxî vejîyayo û ê bêşert amade yê ke bi her kesî reyde masa de ronişê; nêawanbîyayîşê hukmatî yê Başûrî talûke ya û ganî her kes destkewteyanê Başûrî bipawo. Derheqê Rojawanî de ey vat ke entegrasyono demokratîk nêno manaya teslîmkerdişê her çîyî dewlete rê; herêmê kurdan ganî xoser bê û kurdî ganî reyna zîhnîyetê Baasî qebul nêkerê: “Merdimîye deyndarê Rojawanî ya. Mazlum Ebdî vatbî ke tu wezîfe qebul nêkeno û mîyanê şarê xo de maneno; la şêwirmendê Şara bî. Eke no bi nameyê kurdan bîyêne, problem nêbîyêne; rexneyî cayê xo de yê, ma zî rexne kenê, çike ganî qebul nêkerdêne.”
Eke proses ser nêkewo, ma seba şerêko gird zî amade yê
Bayikî peynî de vat ke tena kurdî dostê yewbînan ê; kurdê êzîdî wazenê bi dewleta Iraqî reyde entegrasyono demokratîk bikerê, la PDK, Tirkîya û Îran ney nêwazenê; Qendîl kelaya kurdan a û pawitişê ci wezîfeyê heme kurdan o: “Eke rejîmê Îranî meseleya kurdan çareser nêkero, rijîyeno. Ma seba prosesê haştîye gamî eştî û zemînêk viraşt; ma wazenê nê zemînî pêt bikerê û bi sîyasetî netîceyanê zêdeyêran bigîrê. Eke proses ser nêkewo, ma seba şerêko gird zî amade yê. Heta ke amancê şarê ma nêrê ca, ma têkoşînî ra fek nêveradanê.”
