Hemserekê Pêroyî yê DEM Partî Tuncer Bakirhanî ke Newroza Xelfetî de qisey kerd, derheqê vengdayîşê Rayberê Şarê Kurdî Abdullah Ocalanî de veng da meclîsî ke wa kom bibo. Bakirhanî vat, “Gerek cade serûberkerdişê qanûnî bêrê kerdene.”
Qezaya Xelfetî ya Riha de ke memleketê Rayberê Şarê Kurdî Abdullah Ocalanî yo, bi şîarê “Rayberîya Azade, Komelo Demokratîk” û “Semedê Azadîye Newroza Komelê Demokratîkî” Newroze ameye pîrozkerdene.
Şayîye de posterê Rayberê Şarê Kurdî Abdullah Ocalanî ame akerdene. Hemserekê Pêroyî yê DEM Partî Tuncer Bakirhanî vat, “Xelfetî merkezo muhîm o. Kurdî Xelfetî de est bîyî û Xelfetî de wiriştî payan ser.”
Bakirhanî wina dewam kerd: “Kurdî xeyrê têkoşînê Birêz Abdullah Ocalanî yê xelfetiji zî resenê nasname, anor û haştîya xo. Ma keyfweş ê ke ewro tîya de yê. Na Newroze semedê ma pêrune zaf muhîm a. Ma zaf bedelê girdî dayî la çîkê ma veng nêşi. Ma kewtê bertêngê tarîxêkî ma do rojanê zaf rindan bivînê.”
Bakirhanî bale ante vengdayîşê tarîxî 27ê sibatî ser û nê vatî: “No vengdayîşê haştîya demokratîk a. No vengdayîşê wayûbiratîye yo. No vengdayîşê qedînayîşê polîtîkayanê înkarê serserran o. Birêz Ocalan seba ke kurdî biresê heqanê xo yê demokratîkan û semedê azadîya cinîyan o têkoşîn keno. No vengdayîş têna tesîrê Tirkîya nê tesîrê Rojhelatê Mîyanênî nêkeno.
Badê vengdayîşê Birêz Ocalanî mabenê Fermandarê Pêroyî yê QSD’yî îdareyê demdemî yê Sûrîye de mutabakat ame îmzakerdene. Nê mutabakat de zî senî ke Birêz Ocalanî vat no têkoşînê kurdan ê îdareyî rê hemparbîyayîşî yo. Birêz Ocalanî ma rê eynî wina vat, ‘Tirkîya de bê, kurdan, elewîyan û cinîyan demokrasî nêbeno. Sûrîye de demokrasî bi tewrbîyayîşê heme rengan ê kurdan, êzidî, ermenî û şarê ke ûca de ciwîyenê, beno.’ Birêz Ocalan û bi paradîgmaya xo dinya rê beno nimûne.”
Bakirhanî wina dewam kerd: “Birêz Ocalan veng da la hema îqtîdarî game nêeşte. Ma tîya ra, Xelfetî ra, bajaro ke Birêz Ocalan tede ameyo dinya, veng danê îqtîdarî. Şima çiwext şertanê muzakereyan afirnenê? Şima çi pawenê? Gerek cade şertê Birêz Ocalanî bêrê bedilnayene. Dima ra gerek embazê ma yê ke zîndan de vejê. Gerek ma samîmîyetê dewlete yê vera vengdayîşî bivînê. Eke şima samîmî yê qeyûmanê xo peyser biancê. No vengdayîşo tarîxî yo. Ez veng dana meclîsî. Vera nê vendayîşî wa rolê xo kay bikero. Gerek meclîs cade semedê serûberkerdişanê qanûnîyan kom bibo.”
Badê qiseykerdişan adirê Newroze ame tafînayene û bi deyîranê hunermend Arhatî govende ameye girewtene.
