Hemserekê Pêroyî yê DEM Partî Tuncer Bakirhanî kombîyayîşê grûba meclîsî de bale ante sîstemê edaletî û krîzanê komelkî ser o û vat: “Heta ke demokratîkbîyayîş nêbo nomalbîyayîş nêbeno.” Bakirhanî semedê tewrbîyayîşê 1ê Gulane veng da.
Hemserekê Pêroyî yê DEM Partî Tuncer Bakirhanî qalkerdişê xo yê grûba partîya xo de sîstemê edaletî yê Tirkîya bi ziwanê tujî rexne kerd.
Bakirhanî bale ante dosyaya Gulîstan Doku ser o û vat, “Gulîstan tena kesêk nîya, persêk a. Persêko 6 serrî yê wîjdanî nê welatî rê yeno persayene û cewabê ci nîno girewtene.”
Bakirhanî îfade kerd ke qirkerdişê cinîyan û dosyayanê vîndîbîyayeyan de sîstemê bêcezayîye xorîn bîyo û vat: “Ganî mekanîzmayê edaletî xoser û zelal bêrê rayraberdene. Ganî sere de Gulîstan Doku dosyayanê winayînan de îdîayê derheqê wezîfedaran û dezgehanê dewlete bêrê cigêrayîne. Wakayê winayinî Tirkîya de bawerîya sîstemê hukmî yê Tirkîya zeîf kenê.”
Bakirhanî qalkerdişê xo de bale ante meseleya kurdan zî ser o û vat: “Heta ke demokratîkbîyayîş nêbo normalbîyayîşo komelkî mumkin nîyo. Heta ke demokratîkbîyayîş nêbo, normalbîyayîş nêbeno. Heta ke normalbîyayîş zî nêbo weşbîyayîş nêbeno.Coka ma vanê ke normalbîyayîşo demokratîk do rijnayîşê komelkî zî vindarno. Semedê caardişê normalbîyayîşê sîyasîyî ganî pêro hetê mexdûrî bêrê goşdarîkerdene.
8ê Adare de cinîyan îradeyê xo yê azadîye mojna, 21ê adare de kurdan meydanê Newroze de îradeyê xo yê aştî mojna. Nika zî 1ê Gulane de ganî ma pêro pîya meydanan de wayîrê heqanê xo bivejê. Ma sey DEM Partî semedê tewrbîyayîşê 1ê Gulane veng danê û vanê: Bijî Yek Gulan.”
