Serekê Pêroyî yê MHP’yî Devlet Bahçelî dîyar kerd ke ganî êdî cewabê gamanê Rayberê Şarê Kurdî Abdullah Ocalanî û DEM Partî bêro dayene û çarçewaya heqê hêvî de Abdullah Ocalan azad bibo. Bahçelî waşt ke Selahattîn Demîrtaş zî bêro veradayene. Bahçelî hetêk ra hêrişê YPG’yî kerd û ecizîya xo seba piştgirîya şarê kurdî ya seba Rojava îfade kerd.
Bahçelî kombîyayîşê grûba partîya xo de derheqê Prosesê Aştî û Komelê Demokratîkî de eşkerayîyêka muhîme daye. Bahçelî qiseyanê xo de bale ante gamanê ser o ke Rayberê Şarê Kurdî Abdullah Ocalanî eştê û wina qisey kerd: “Heta ke Anatolîya biresa aramî, Ocalan bireso hêvî, Ahmetî agêrê meqamê xo û Demîrtaş agêro keyeyê xo qerarê ma zelal o.”
Bahçelî persê, “Serekê Awankerdox ê PKK’yî 27ê sibata 2025î ra heta nika heme sozê ke dabî înan ser o vindert? Ser o cewabê, “Heya, vindert” da. Bahçelî qiseykerdişê xo bi persanê, “Rêxistine xo fesih kerd û çekî îmha kerdê? Na fermane hetê heme temsîlkaranê PKK’yî ra ameye ca?” cewabê, “Heya, nê heme ameyê kerdene.” domna. Bahçelî vengdayîşê eştişê gamanî ke do bibê cewabê qeraranê Ocalanî kerd.
Hêrişê YPG’yî kerd
Bahçelî eşkerayîya xo de bale ante hedîseyanê Sûrîye ser o û hêrişê YPG’yî kerd ser. Bahçelî derheqê Rojavayê Kurdîstan û YPG’yî de nê îdiayî îfade kerdê: “Cehdê bedinayîşê hedîseyanê Sûrîye seba Tirkîya û provokekerdişê birayanê ma yê kurdan bi tu hewayî bi nîyeto baş nîyê. Têhetardişê birayanê ma yê kurd û rêxistina YPG’yî xefletêko gird o. Sûrîye de paradîgmayêka newa û awanîyêka newe ameya awankerdene. Na rewşe armancêk a ke ameyêne zanayene.”
Vat ‘Kurd ma yê’ la piştgirîya Rojava ra eciz bi
Bahçelî yew het ra qala birayîya kurdan kerd heto bîn ra ecizîya xo ya piştîdayîşê şarê kurdî ya seba Rojavayê Kurdîstanî îfade kerd û vat: “Ê ke nefretî ramenê do vîndî bikerê, ê ke fitne vejenê do vîndî bikerê. Tirkî yê ma yê, kurdî yê ma yê. Mîletê kurdî ma bi xo yê û ma heme yê.”
Bahçelîyî peynîya qiseykerdişê xo de îdia kerd ke heta heqê merdiman û azadîye bi temamî bêrê ca, ê do têkoşînê xo bidomnê.
