Aktîvîsta TJA’yî Bahar Peker va ke ê çarçeweya 25ê Teşrîna Peyêne de atolyeyan virazenî û wina va: “Atolyeyan de ma cinîyan rê derheqê weşîye, made û tiryakan de melumatan danî û xebatanê zîhnîyetî aver benê. Heta 25ê Teşrîna Peyêne zî programê ma do dewam bikerê. Ma do 25ê Teşrîna Peyêne ra pey zî, bi hêzê 25ê Teşrîna Peyêne plansazî û xebatanê xo do bidomnê.”
25ê Teşrîna Peyêne ke nêzdî bena, her ke şono qirkerdişê cinîyan zêdîyenî, polîtîkayê bêcezakerdişî yê dewlete, cinîyan keno hedef. Tena aşma Teşrîna Verêne de 29 cinîyî hetê camêrdan ra ameyî qetilkerdiş, 15 cinîyî zî bi şik û guman dînyaya xo bedilnaye. Vera zêdîyayîşê qirkerdişê cinîyan û zîhnîyetê camêrdan de cînîyan çarçeweya 25ê Teşrîna Peyêne de tewir bi tewir xebatan organîze kenê.
Aktîvîsta TJA’yî Bahar Peker derheqê muhîmîya 25ê Teşrîna Peyêne Roja Têkoşînê Vera Şîdetê Cinîyan a Mîyanneteweyî û xebatanê xo yê ke do bikerî, ajansê ma rê behs kerd.
‘Rojêka têkoşînî ya’
Aktîvîsta TJA’yî Bahar Peker va ke na roje seba cinîyan zaf muhîm a, no ser zî ez eşkena tarîxê na roje ra behs bikera û wina va: “Mîrabal Wayî 25ê Teşrîna Peyên ya 1960î de vera diktatorîye de têkoşîn da û sere hewana. Rixmo ke Mîraba Wayî ameyê hespkerdene zî têkoşînê xo ra fek veranêda. La çi heyf o ke sîstemo faşîst înan bi hewayêko wehş qetil kerd. Serra 1981î de, Kurultayê Cinîyanê Amerîkaya Latîne û Karayîbî yê Sifteyên de, 25ê Teşrîna Peyêne sey “Vera Şiddetê Cinîyan û Roja Têkoşînê Mîyanneteweyî ” ameye qebulkerdene. No ser na roje semedê kiştiş û vera şîdetê sey rojêke têkoşînî ya.”
‘Cinîyê kurdî resayê merheleyêkî’
Aktîvîsta TJA’yî Bahar Peker bal ant ser şîarê TJA’yî yê 25ê Teşrîna Peyêne ya emserre û wina domna: “Şîara ma; ‘Ma xo, bi xo pawenê’ û şîara ma ya binî zî ‘Ma Komelê Demokratîkî wazenê’ ya. Nika Tirkîya de pêvajoyêk est a, emserre ma 25ê Teşrîna Peyêne de hêzê xo na pêvajo ra gênê û bi nê hêzê kuçe bi kuçe gêrenê. Ma xebatanê xo yê 25ê Teşrîna Peyêne û proseso ke domyeno, pîya kenê. Ma sey cinîyê her tim binê zor û zehmetîye de bîyê, 5000 serrê ke çi heyf ke sey kole cuyeyê. Nika xususî cinîyê kurdî bi felsefeya Rayberê Şarê Kurdî Abdullah Ocalan resayê ca û merheleyêkî. Bi bi nê hêzî rayîr ra şinê, ma dîyenî cinî senî binê sîstemî de ameyê ecaqnayene. Ma wazenî cinîyê kurdî bi hêzêko gird heme hetî ra xo bipawo. Xo ra Birêz Ocalan zî wa cinîyê na pêvajo de rayberî bikerî. Seba awankerdişê komelo demokratîk zî ganî ma bingeyê ci awan bikerî. 4 stunê nê bingeyî est ê, ewil ganî ma meclîsanê xo yê komînî awan bikerê. Dima meclîs, kooperatîf û akademîyanê cinîyan awan bikerî. Eke ma înan biakerî, do demokrasî aver şîra û biba demokrasîya ma ya heminî.”
‘Bernameyê ma hedra yo’
Bahar Peker bernameyê 25ê Teşrîna Peyêne ser o wina va: “Çarçeweya na roje, tewir bi tewir bernameyê ma est ê, 17ê qezayanê Amedî de vera şîdetî seba cinî, tut û ciwanî atolyeyanê ma est ê. Atolyeyan de ma behsê şero taybet, ser bedenê cinî û tutîye de şîdetî ra kenî. Hewna atolyeyan de ma cinîyan heqê weşîye de zî malûmat danî. Hewna vera made û tiryakan de zî xebatê ma est ê, hetanî 25ê Teşrîna Peyêne zî bernameyanê ma domyenê. Ma do 25ê Teşrîna Peyêne ra peynî, bi hêzê 25ê Teşrîna Peyêne plansazî û xebatanê xo do bidomnê. Çimkî Kurdistan şero taybet xususî cinî, ciwan û tutan de domyeno, ma do xebatanê xo yê hişmendîye kuçe bi kuçe û tax bi tax dewam bikerî.”
