Badê pêvînayîşê Amerîka û Îranî yê Umanî Serekwezîrê Îsaraîlî Benjamin Netanyahu eşkera kerd ke do şoro Amerîka û bi Serekê Amerîkayî Donald Trumpî reyde kom bibo.
Dima yê kombîyayîşê serê nukleerî yê şaristanê Mesqete Paytextê Umanî de mabênê temsîlkarê Amerîka û Îranî ve virazîya Ofîsê Serekwezîrîya Îsraîlî eşkera kerd ke Serekwezîr Netanyahu do 11ê sibate de şoro zîyaretê Amerîkayî û Washington de bi Serekê Amerîkayî Donald Trumpî reyde pêvînayîş bikero. Eşkerayî di babetan de ewnayîşê Îsraîlî dîyar kerd. Goreyê naye Îsraîl wazeno ke Amerîka pêvînayîşanê bi Îranî ra babeta fuzeyan û vindarnayîşê paştîdayena seba mîlîsanê herême bikewo rojeve û derheqê înan de netîce bigîro.
Sewbîna zî îsraîl wazeno peymana ke averde virazîyo tena ne meseleya nukleerî, eynî wextî de tehdîdê bînî yê Îranî yê serê herême zî mîyan de wa ca bigîrê. Roja 7ê sibate 2026î temsîlkarê Amerîkayî yê taybet ê Rojhelatê Nîyanênî Steve Witkoff û şêwirmendê Donald Trumpî Jared Kushner bi Wezîrê Karanê Teberî yê Îranî Abbas Arakçî reyde şaristanê Mesqete paytextê Umanî de kombîyayîş viraştbî. Serekê Amerîkayî Donald Trump badê kombîyayîşî dîyar kerd ke pêvînayîşê başî kerdê, Îran wazeno înan reyde peymane virazo û pevînayîşî dewam bikero.
Wezîrê Karanê Teberî yê Îranî Abbas Eraqçî zî badê kombîyayîşî dîyar kerd ke pevînayîş de tena serê nukleerî de xeberî dayo û do pevînayîşî dewam bikerê.
