Wekîla Dersimî Ayten Kordu, serrgera biryara Heyetê Vekîlan a 4ê Gulana 1937î de, seba iadekerdişê nameyê herêmê yo tarîxî û seba cigêrayîşê heqîqatan, yew teklifê qanûnî yo ke 10 maddeyan ra yeno pê, pêşkêşê Serêktîya TBMM’î kerd.
Teklifo ke Wekîla Partîya DEM’î Ayten Kordu amade kerdo û kewto qeydanê meclîsî; abîyayîşê arşîvanê dewletê yê wextê 1937-38î ra bigêrê heta iadekerdişê heqanê kulturî, xeylê serastkerdişanê qanûnî nîşan dano. Gerekçeya pêroyî ya teklifî de ameya vatenê ke seba awankerdişê haştîya komelî, “heqîqatanê tarîxîyan ra têrîameyîş” mecburîyetêko qanûnî yo.
Abîyayîşê arşîvan û teklifê komîsyonê heqîqetî
Madeyo tewr muhîm ê teklifî, awankerdişê komîsyonêkê serbestî yê bi nameyê “Komisyonê Heqîqat û Edaletî” yo.
Seba nê komîsyonî, şerhê “sirrê dewlete” yê serê arşîvanê Serektîya Erkanê Pêroyî û sazîyanê bînan wa bêrê wedartene.
Biryarê leşkerî û polîtîkî yê nê dewrî wa hetê akademîk û huquqî ra bêrê vejenayene.
Madeyo dîyîn ê teklifî zî derheqê nameyê şaristanî de yo. Bi Qanûnê Tuncelî yo ke 1935 de ameyo vetene nameyê şaristanî ameybi vurnayene; teklif wazeno ke nameyê şaristanî reyna kokê xo yê tarîxî ra girêdîyo û bibo “Dersim.” Sebeb de ame vatenê ke na vurnayîş seba “îadekerdişê hafizaya komelî” zaf girîng o.
Vîndîbîyayeyî, mezelî û tespîtê DNA
Waştişê serastkerdişê qanûnî tena bi vurnayîşê nameyî sînorkerde nîyo. Sernuşteyê teklifî nê yê:
Tespîtkerdişê Cayanê Mezalan: Seba ke meyîtê Seyîd Riza û embazanê ey radestê keyeyanê înan bêrê kerdene, wa tespîtê DNA û tespîtê mezelan hetê dewlete ra bêro kerdene.
Mekanê Hafizaye: 4ê Gulane wa sey “Roza Şaye” bêro naskerdene û seba vîrardişê nê dewrî “Abîdeyê Hafizayî” bêrê viraştene.
Keynekê Vîndîbîyayeyî: Seba ke aqûbetê domananê ke ameyê sirgunkerdene û sey “Keynekê Dersimî yê Vîndîbîyayeyî” yenê naskerdene bêro tespîtkerdene, wa yew yewineya taybete bêra awankerdene.
