Verfeka DEM Partî Ayşegul Dogan derheqê xoverdayiş û rojeva MYK’î ya DEM Partî de qisey kerd û va ke proses mîyanê yew merheleyê krîtîk de yo û wina va: “Çekî bêveng bîyê, gere qanûnî bêrê viraştiş, rayîrê sîyasetê demokratîkî abîyo. Labelê, çîyêk nêameyo kerdene.”
Verfeka DEM Partî Ayşegul Dogan derheqê xoverdayiş û rojeva MYK’î ya DEM Partî de merkezê pêroyî de yew eşkerayî daye. Ayşegule Dogan eşkerayîya xo de va ke her ca de tengayîyêk mîyanê aşîtî û şerî de est a û wina va: “Ma serrgêra komploya mîyanneteweyî ya vera Rayberê Şarê Kurdî Abdullah Ocalanî de yê. Bi komploya mîyanneteweyî ame waştine ke mabenê şarê kurd û tirkî wa nêbaş bibo. Labelê, o armanc ser nêkewt. Têkoşînêko gird û bedelê girdî ameyî dayene. Nika zî ma mîyanê yew prosesê krîtîk de yê. Birêz Abdullah Ocalan prosesê komployî de zî modelê ciwîyayîşê demokratîkî pêşkêşê pêroyîya Rojhelatê Mîyanênî kerd.”
Ayşegul Dogan dewamê qiseykerdişê xo de derheqê têgehê Abdullah Ocalanî yê ‘Entegrasyonê Demokratîkî, Muzakereyê Demokratîkî, Komînalîzmê Demokratîkî’ de va ke ne kilîtê ciwîyayîşê demokratîkî yo û wina dewam kerd: “Çira nêzdîyê îradeya Abdullah Ocalanî ke proses de mojnaye ciddî nêbenê? Her di vengdayîşê Birêz Abdullah Ocalanî bandor serê ciwîyayîşê bi mîlyonan kesî keno, kes nêeşkeno wina nêzdîyê ey bîyo. Gere qanûnî bêrê viraştiş, rayîrê sîyasetê demokratîkî abîyo. Labelê, çîyêk nêameyo kerdene. Tena bi qisey nêbeno, vanê ma mîyanê yew prosesê averberdişî de yê, labelê hewceyîyê ê prosesî est ê. Qiseyê nê çîyan beno, labelê çîyêko verçiman nêno kerdene. Yanî gere ma bivînê ke tecrîd bi temamî wedarîyo. Gere Birêz Abdullah Ocalan pêro kesan reyde qisey bikero. No ne tenya verpirsîyarîya DEM Partî nîya.”
‘Gere komîsyon şêro Girawe’
Ayşegul Dogan nîşan kerd ke, gere komîsyon şêro Îmraliyî û wina dewam kerd: “Birêz Bahçelî zî va. Ma nê qiseyan bi manayî vînenê. Labelê, Serekê Meclîsî hema zî derheqê nîyê de çîyêk nêvato. Gere Birêz Ocalanî ra hawil bêro girewtiş. Meşte 10ê Citmenge ya, serê qirkerdişê Garê Anparayî ra 10 serrî vîyartî. Birînê ma hema zî newe yê. Her wina 6-8ê Citmenge zî wina bî. Labelê, a komplo hema zî bi nêveradayîşê embazê ma dewam kena. Gamê ke seba demokratîkbîyayîşî bêrê eştiş eşkera yê. Hêvîya demokratîkbîyayîşê Tirkîye aştî ra vîyerena. Dewa komplo ya Kobanê yew komplo ya. Vera embazê ma dosye de sucêk nêameyo eşkerakerdiş. Girewtişê embazê ma bêhiqûqî yo. Proses mîyanê yew merheleyê krîtîk de yo. Proses tenya serê birêz Abdullah Ocalanî de yeno îdarekerdiş, gere hetê yewbînan de gamî bêrê eştiş.”
‘Nûşteyê ke serê medyaya sanal de yeno nîqaşkerdiş zure yo’
Badê eşkerayî rojnamegeran zî persî persayî. Ayşegul Dogan serê persa nûşteyê Rayberê Şarê Kurdî Abdullah Ocalanî ke nê demê peyênî de serê medyaya sanal de yeno nîqaşkerdiş, cewab da û va ke yew nûşteyo wina çin o.
Ayşegul Dogan teyît kerd ke badê vengdayîşê 27ê Sibate yê Aştî û Komelê Demokratîkî Abdullah Ocalanî xeylî kesan rê nûşte şirawito, yew zî înan ra Rayberîya Xoser bîya, labelê cîya ci ra yew nûşteyê bîn çin o, hetê Abdullah Ocalanî ra Rayberîya Xoser ameyo şirawitiş zure yo.
