Avûkat Mahsunî Karamanî ke qerarê binpaykerdişî yê AYMyî yê derheqê Mazlum Îçlîyî de erjna, vat ke delîlî beraetî wazenê û ganî tesîrê îklîmê sîyasî yê ê demî yê hukmkerdişî ser o newe ra bêro dest girewtene.
Dadgeha Qanûnê Esasî (AYM) muracatê ferdî yê Mazlum Îçlîyî kerdî yew û etud kerdî. Îçlî dewaya kiştişê çar kesan ê 7ê teşrîna verêne 2014î yê qezaya Baglarî ya Amedî de mehkûm bîbî; Yasîn Boru zî nê çar kesan mîyan de bî. AYMyî tesbît kerd ke têzadê mabênê dîmenanê ke mehkûmîyet înan ser o awan bîyo û delîlanê ke mojnenê Îçlî saeta serebûdî de qezaya Pasûrî de bî nêameyî hewanayene. AYMyî hukm kerd ke heqê qerarê bisebebî ameyo binpaykerdene û ganî hukmkerdişo newe bêro kerdene.
Badê qerarî avûkatanê Mazlum Îçlîyî Dadgeha Cezayê Giranî ya 2. ya Ankara rê muracat kerd û waşt ke heta ke hukmkerdişo newe biqedîyo înfaz bêro vindarnayene û Îçlî bêro verdayene. Muracatî rê hema cewab nêameyo dayene.
Avûkat Mahsunî Karamanî vat ke merkezê pawitişî de delîlê ke mojnenê Îçlî saeta serebûdî de merkezê Amedî ra nêzdîyê 140 kîlometreyî durî, Pasûr de veyveyêk de bî est ê. Ey dîyar kerd ke înan dîmenê veyveyî, vateyê şahidan û qeydê telefonî pêşkêşê dadgehe kerdî û zama û şoforê taksî zî dadgehe de ameyî goştarîkerdene.
Karamanî wina vat: “Hukmkerdişê cezayî de eke bê şikî nêro îspatkerdene ke tawanbarî sûc kerdo, ganî qerarê beraetî bêro dayene. Na dosya de dîmenê veyveyî, zabitnameyê qewetanê asayîşî, vateyê zama û şoforê taksî û qeydê telefonî yewbînan raşt kenê.” Ey vat ke ganî dadgehe nê delîlan pîya bierjna û têzadê mabênê raporanê pisporan ê derheqê nasnameyê kesê dîmenan de hewa na.
Karamanî bale ante têkilîya na dewa û dewaya Kobanê ser o û wina vat: “Kiştişê Yasîn Boruyî pêşkêşkerdişê sûcdarkerdişanê vera Demîrtaşî û embazanê ey de bî sembolêko sîyasî. Eynî serebûd dewaya padayîşê HDPyî de zî sey bingeh ame mojnayene. Qenaetê ma o yo ke tedaya sîyasî ya dormeyê dosyaya Kobanê şeklê hukmkerdişê Mazlum Îçlîyî û embazanê ey ser o zî tesîr kerdo.”
Karamanî vat ke netîceyê qerarê AYMyî yo rasterast newe ra hukmkerdişê Mazlum Îçlîyî yo û tesîrê ci yê dewaya Kobanê ser o do sînordar bimano. Ey wina peynî ard: “Qerarê binpaykerdişî îmkan dano ke ma ewro peyser biewnîyê û newe ra bierjnê ke îklîmê sîyasî yê ê demî şeklê hukmkerdişê hem sîyasetmedaranê dewaya Kobanê hem zî Mazlum Îçlî û embazanê ey ser o senî tesîr kerdo.”











