Avûkat Medya Abdî bal ant Mehkemeya Şaran a Rojawanî ser o ke dewleta tirk seba sucanê xo yê Vakûr û Rojhelatê Sûrîye yena muhakemekerdene û ard ziwan ke ganî qadê mîyanneteweyî hemverê qetilkerdişê cinîyan bêveng nêmanê.
Mehkemeya Şaran a Rojawanî ke dewleta tirke seba sucanê xo yê Vakûr û Rojhelatê Sûrîye yena muhakemekerdene, paytextê Belçîka Brukselî de ame kerdene. Mehkema (tribunal) li L’Université Libre de Bruxelles (Unîversîteya Azad a Brukselî-ULB) 5-6ê sibate 2025î de ameye ronayene. Mehkema hetê Komîteya Têkîlîyanê Teberî yê Rayberîya Xoser a Vakûr û Rojhelatê Sûrîye, gruba avûkatan ke sucanê dewleta tirke teqîb kena, Merkezê Pawitiş û Cigêrayîşê yê Heqanê Cinîyan û rêxistinê cîya yê heqanê merdiman ra ameye organîzekerdene.
Mehkeme hetê hûqûqnas û derûdoranê cîyayan ra ameye teqîbkerdene. Avûkat û komîteya amadekar ya mehkemeyî Medya Abdî Ajansê ANHA’yi rê qisey kerd.
Medya Abdî dîyar kerd ke mehkema de sucê dewleta tirke ameyê nîqaşkerdene û wina vat: “Babetê esasî yê ke ameyê nîqaşkerdene, babeta qetilkerdişê cinîyan, hêrişê cayanê dînîyan ser o, merkezê weşiye û cayê tarixî û koçberbîyayîş.”
Avûkat Medya bale ant koçberan ser o ke riyê hêrişanê dewleta tirke û grûbanê paramîlîteranê girêdayeyê aye Efrîn ra koçber bîyê û vat: “Serra 2018î de Efrîn de riyê hêrişanê dewleta tirke ra 300 hezar kesî mecbûrîye ra kampanê Şehbayî yê qerebalixan de ameyê bi akerdene. Aşma kanûna 2019î de artêşa tirke 2 bombeyî eştê gedeyê kuçeyan ser o ke nêzdîyê dibistanêkê herême bi temamî cayê sîvîlan bi û gedeyan uca de kay kerdêne. 8 înan gede, 10 kesan cuya xo vîndî kerd. Serra 2024î de zî şarê Efrînî Şehba ra koçber bi û vera xo daye herêmanê Vakûr û Rojhelatê Sûrîye yê herêmê Rayberîya Xoser.”
Medya Abdî dîyar kerd ke mehkema de babetêka bîne ya ewiline zî qetilkerdişê cinîyan bi. Seba ke dewleta tirke her tim cinîyan hedef gêna û wina vat: “Dewleta tirk Hevrîn Xelef, Zehra Berkel, Zeyneb Sarûxan û gelekî cinîyê bînê ke sazîyanê cinîyan de xebitîyenê, hedef girewtê. Trîbunalî de zî na babete ameye nîqaşkerdene. Maya Hevrîn Xelef û waya Zeyneb Sarûxan trîbunalî de behsê hedefgirewtişê înan kerd.
Medya Abdî dîyar kerd ke dewleta tirke îradeyê cinîyan ra terseno o semed ra cinîyan hedef gêno û vat: “Şorişê Rojawanê Kurdîstanî de cinîyan xo heme qadan de rêxistin kerd û bîyê pêşengê komelî. Bi taybetî verba çeteyanê DAÎŞ’î de cinîyan fedakarî kerd û resayê daraxê şehadetî.”
