Awankerdoxanê AKP’yî ra Bulent Arinç vat: “Heqê hêvî heqêko muhîm o. Tena seba Ocalan nê, seba her kesî derbasdar o.”
Awankerdoxanê AKP’yî û Serekê Meclîsî yê Verênî Bulent Arinç Medyascopeyî de Ruşen Çakirî rê qisey kerd. Arinçî dîyar kerd ke o paştî dano proseso nikayîn û vat: “Bi çi hewayî beno wa bibo, ma paştî danê prosesî ke na mesela êdî biqedîya.”
Arinçî dîyar kerd ke pawitişo pozîtîf yê DEM Partî ey ser o zî tesîr keno û vat: “Mi ê pêro zaf keyfweş dîyî. Tewr peyên ez şîya hetê Bakirhanî. Her kesî de hêvîyêk est a. Mi vat ‘o wext ma zî do keyfweş bibê.’”
Dewamê qiseykerdişê xo de Arinçî bale ant qerarê binpaykerdişê “Heqê hêvî” ser o ke Mehkemaya Heqanê Merdima ya Ewropayî (DMME) derheqê Rayberê Şarê Kurdî abdullah Ocalanî de dabi û vat: “Heqê hêvî heqêko muhîm o. Tena seba Ocalan nê, seba her kesî derbasdar o. Hêvî hiso tewr sereke yo ke keno ke merdim biciwîyo.”
