Partîyê sîyasî û Komîteyê Amadekar ê Mîtîngê 1ê Gulane Amed de vilawekî vila kerdê û şar silayna mîtîng.
1ê Gulane Roja Roşanê Karkeran Qada Îstasyonî ya Amedî de do bêra pîrozkerdene. Partîyanê sîyasî, sazgehanê sîvîlan û sendîkayan bi munasebetê 1ê Gulane bêmabên xebatanê amadekarî domnenê. Hemsereka Amedî ya DEM Partîyî Gulşen Ozer, Partîya Sosyalîstanê Bindestan (ESP), Konfederasyonê Sendîkayanê Karkeranê Şorişgeran (DÎSK), şubeyê Konfedarayonê Sendîkayanê Kedkaranê Camewerîyî (KESK), TMMOB û Komîteya Amadekar ê Mîtîngê 1ê Gulane û reyna xeylê welatijî vernîya AZC Plazaya Semta Ofîsî ya Amedî de kom bîyê û eşkerayî daye. Eşkerayî ra pey zî vilawekî şarî rê ameyê vilakerdene û welatij û dikandarî silaynayê mîtîngê 1ê Gulane.
‘Ma şarê xo silaynenê mîtîngê 1ê Gulane’
Hemsereka Amedî ya DEM Partîyî Gulşen Ozere eşkerayî de dîyar kerd ke qada Taksîmî qada 1ê Gulane ya û wina vat: “1ê Gulane roja kedkaran a. Ma şarê xo rê vanê, bêrê seba kedkar, karker û ameyoxê gede û cinîyan ma roşanê xo pîroz bikerê. Ewro zî b, munasebetê 1ê Gulane xeylê kesî Stenbol de ameyê destbendkerdene. Ma wazenê heme kesê ke ameyê destbenkerdene, bêrê veradeyene.”
Endama Meclîsê ESP’yî Beycan Taşkiran zî waşt ke ê ke ewro bi manayê do 1ê Gulane Taksîm de pîroz bikerê, ameyê destbendkerdene, bêrê veradayene. Beycan Taşkiran da zanayene ke ê zilm û zordarîye 1ê Gulane ser o qebul nêkenê û waşt şar beşdarê mîtîngê Qada Îstasyonî bo.
Qiseykerdişan ra pey kuçe û cehdeyanê Ofîsî de vilawekî ameyê vilakerdene û welatij û dikandarî silaynayê mîtîng.
