Wekîla DEM Partî ya Amedî Adalete Kaya vat ke îqtîdarê AKP-MHP’yî wazeno ke şaredarîyan krîmînalîze bikero û venga pêro beşanê komelî da ke vera kerdişanê antî-demokratîkan têkoşînê hemparî pîl bikerê.
Adalete Kaya ard ziwan ke îqtîdar bi tayînkerdişê qeyûman keno ke qesasê binkewtişê xo yê weçînayîşan bigêro û vat: ”Îqtîdar îradeyê şarê ma çin hesibneno û keno ke şaredarîyanê ma krîmînalîze bikero. Hemşaredarê ma yê Akdenîzî bi îfadeyanê ‘şehîdê nimiteyî’ erkî ra ameyî girewtene û herinda înan de qeyûm ameyî tayînkerdene. Sere de şarê kurdî pêro şarê Tirkîya ganî vera ney nêrazîbîyayîşê xo bimojnê.
Tayînkerdişê qeyûman kerdişêko antîdemokratîk o. Destsernayîşê şaredarîyanê Êlih, Mêrdîn û Xalfetî ra verê cû binê sîwana Meclîsî de ma qanûnêko hempar partîyanê muxalîfan rê pêşkêş kerdbi. Vernîyazê ma waştêne ke wa qanûnê Rewşa Îstîsnayîye yo ke zemînê destsernayîşî aferneno bêro vurnayene. Binê vernîyazî de îmzaya 10 partîyanê muxalîfan est a.
Şar vera qeyûman verî ra nata mîyanê xoverdayîşî de yo. A raşte îqtîdar zî zeneno ke hinî şar bi na polîtîka nêxapîyeno. La îqtîdarî derse nêgirewte. Nê prosesî de ke Birêz Abdullah Ocalanî de pêvînayîşan yeno kerdene tayînkerdişê qeyûman raşt nîyo û do zerar bido prosesî.”
Adalete pare kerd ke vera polîtîkayanê qeyûmî ganî xetêka têkoşînî ya topyekûne bêra awankerdene û vat: ”Qeyûmî vera îradeyê kurdan yenê tayînkerdene la bi kurdan sînordar do nêmanê. Ma dî ke şaredarîyanê Beşîktaş û Esenyurtî rê zî qeyûmî yenê tayînkerdene. Ganî vera tayînê qeyûman her beşê komelê Tirkîya tewir bimojno. Têkoşînê demokrasîyî ney hewce keno.”
Çime: ANF
