Rayberê Şarê Kurdî Abdullah Ocalan Hepisxaneyê Îmralîyî ra derheqê serrneweyî de mesajêk erşawit û vat: “Wa serra newîye biba serra aştî, wa nêba serra şerî.” Eynê wextî de Ocalanî vat ke caardişê Peymana 10ê Adare do vernîya prosesî akero û aver bero.
Rayberê Şarê Kurdî Abdullah Ocalanî bi wesîleya serrneweyî, derheqê averşîyayîşê ke Rojhelatê Mîyanênî, Kurdîstanî û dinya de qewimîyenî de Hepisxaneyê Îmralîyî ra mesajêk erşawit. Rayberê Şarê Kurdî Abdullah Ocalan mesajî de, riyê şer, pêkewtiş, rijîyayîş û binkewtişanê komelî hişyar keno û seba aştî, demokratîkbîyayîş û pêameyîşê şaran pêşnîyazan keno.
Mesajê serrneweyî yê Rayberê Şarê Kurdî Abdullah Ocalanî yê bi sernameyê “Serra Newiye; Nêba Serra Şerî, Wa Biba Serra Aştî” wina yo:
“Ma dekewenê serrêka newîye. Ma mecbur ê ke bîyarê vîrê xo; pêroyê seserre ke ma vîyarnaye, hêrîşê emperîyalîst û nîjadperestî têmîyan de aver şîyî û Rojhelatê Mîyanênî eşt mîyanê şer û pêkewtişanê giran. Nê şerî vernîya binkewtiş û xeripnayîşanê komelkî akerd. Ewro herême de mezhebperestîya ke virazîyena û heme netewperestîya nijadî, heme kokê xo no tarîxo nêzdî yo dekerde ra gêno. Çi heyf ke sîstemê hegemonîk, bi stratejîyê “parçe bike, lete bike û îdare bike” bi hewayanê cîyayan yeno domnayene.
Perspektîfê Aştî û Komelê Demokratîkî vernîya ma de vindeno
Tam zî semedê naye bi heme zor û zehmetîyan, perspektîfê Aştî û Komelê Demokratîkî ke ma aver berd tena tercîhêk nîyo, bi hewayêko mecburîyetêko tarîxî yo ke vernîya ma de vindeno. Eke no perspektîf raşt bêro fehmkerdene û bêro erjnayene, do vernîya şer û pêkewtişan bigîro û vera naye de zî do heme netewî bi hewayêko seypê û cuyêka azade pîya biciwîyê. Eke yewîya şaran virazîya do no bibo jehrkişt vera şer û pêkewtişan. Dewrê vernîya ma de berpirsîyarîyêka ma ya tarîxî û bingeyîne est a; na zî a ya ke ma ganî vernîya şer û pêkewtişan bigîrî û ma do vernîya netîceyanê felaketî bigîrî.
Krîzê Rojhelatê Mîyanênî
Rojhelatê Mîyanênî de krîzêko giran est o û şerê polîtîkî est ê. No zî dewamê despotîyêka hezar serran a ke heta ewro yena. No zî riyê ferasetê şaristanîya dewletperest ra yo ke îqtîdarî ser o xo îdare keno, vejîyeno orte û xetimîya yo û netîceyo ke nêeşkeno xo bidomno.
Meseleyê kurdî merkezê nê krîzan de ca gêno. Çareserîya problemî zî eşkena bi aştîyêka komelkî û pêameyîşêko demokratîk bêro ca. Problemî bi metodanê pêkewtiş, şer, leşkerî û ewlekarî nê, eşkenê bingeyêko demokratîk de ke îradeyê şaran xo rê esas gêno bêro çareserkerdene û bi nê hewayan bêro dest de girewtene, muhîmîyeya canî est a.
Heta ke cinî azad nêbê komel zî azad nêbeno
Ganî ma xo vîr ra nêkerê ke heta ke cinî azad nêba komel zî azad nêbeno, no mumkin nîyo. Heta ke problemê zîhnîyeto serdest ê camêrdîye nêro çareserkerdene, kulturê şerî nêqedîyeno û aştî zî domdar nêbena. Coka ez azadîya cinîyan, sey awankerê komelê demokratîkî û prensîbê bêagêrayîşî gêna dest.
Muhîmîya caardişê Peymana 10ê Adare
Sûrîye de zî tabloyekê kaotîke vejîyaya orte. Zaf bi hewayêko eşkera paweyê çareserîyêka demokratîke yo û na hewcedarîye wazena. Ferasetê îdarekerdişî ke bi serran xo yewperestîye, teda û înkarkerdişê nasnameyan ser o rayra berd; êdî mumkin nîyo bidomîyo û no waştişê têduştî û azadîya kurd, ereb, elewî û heme şaran xurt kerdo. Mabênê HSD û îdareya Şamî de Peymana 10ê Adare ameybî îmzakerdene, çarçeweya na peymane de waştişê ke yenê îfadekerdene, modelêkê sîyasî yê demokratîkî ke tede heme şarî yanî netewî pîya xo bi xo îdareyê xo bikerê. No nêzdîbîyayîş eşkeno bi îdareyê merkezî reyde muzakere bikero û bingeyêko entegrasyono demokratîk xo de bihewêno. Caardişê Peymana 10ê Adare do vernîya prosesî akera û eynî wextî de prosesî aver bera.
Vera şorişê nêgatîf, şorişê pozîtîf
Tarîxê Rojhelatê Mîyanên yo modern, bi giranî tarîxê ‘şoreşê nêgatîfî’ yo. Şer, zordarîye, înkar û binkewtiş… Vera ney zî pêşnîyazê ma ‘şorişo pozîtîf’ o. Yanî newera awankerdişê komelî bi hewayêko demokratîk, aştîyane û exlaqî. Aştîya ke ma bi israr pawenê netîceyêk nîya, ganî bibo destpêkêko newera. Û têkoşînê heq, huqûq û demokratîkbîyayîşî yo ke mîyanê aştî de yeno rayraberdene do kîn, dişmenîye û hêrsî wedarno û seba her kesî berê cuyêka newa akero.
Bi nê zanayîşî wa serra newîye nêba serra şer, binkewtiş û cîyakerdişan, ez hêvî kena ke biba serra îradebîyayîşê awankerdişê pêameyîşo demokratîk, aştî û ma pîya bikerê îradebîyayîşo hempar ê awankerdişê ameyoxê şaran.
Waştişê mi o yo ke serra newîye Tirkîya, Rojhelatê Mîyanên û dinya de, rayîrê aştî, azadîye û ameyoxêko demokratîk akero. Sere de serra şaranê ke têkoşîn kenê, ez serrneweyî heme dostan pîroz kena.
Ez hêvî kena ke serra newîye seba heme şaranê ma aştî û cuyêka bi hurmet bîyara, ez heskerdiş û silamanê xo erşawena.
Do no dem bi azadîya cinîye xurt bibo, mîyanê aştî de şarî bi demokratîkbîyayîşî bibê yew.
30ê Kanûna 2025î
Abdullah OCALAN
Îmrali.”
