Parlamenterê DEM Partî Omer Ocalanî pare kerd ke Abdullah Ocalanî zîyaretê roşanî de venga DEM Partî dayo ke her ca de hêzê xo bizêdîno û vato: “Ganî DEM Partî heme ca de xo birêxistin bikera û hêzê xo veja orte.”
Rayberê Şarê Kurdî Abdullah Ocalanî bi wesîleya Roşanê Qurbanî Îmrali de birazayê xo û Parlamenterê DEM Partî Omer Ocalan, lajê waya xo Alî Ocalan û di domanê Alî Ocalanî dîbî.
Omer Ocalanî derheqê pêvînayîşî de Ajansê Mezopotamya (MA) rê qisey kerd. Omer Ocalanî derheqê pêvînayîşî de nê agahîyî dayî:
“Serek Apoyî 15-20 deqanê verênan de qalê dewe û keyeyî kerd, silamê xo erşawitî. Dima qalê xebatanê xo û serweşîyanê seba Riza Altun û Alî Haydar Kaytanî kerd. Keyeyê Kaytan, Altun û Mazlûm Doganî pers kerd û înan rê silamê xo erşawitî. Keyeyê Ferhat Kurtayî pers kerd, dima qalê çar embazanê xo Ferhat Kurtay, Eşref Anyik, Mahmut Zengîn û Necmî Onerî kerd ke Zîndanê Amedî de bedenê xo dabi adirî ver. Ey qalê tayê serebûtanê dewa Xursî ya Qoserî kerd.
Ma ey rê silamê ê merdimanê ke 30 serran ra dima zîndanî ra veradîyayê kerd. Rayber Apoyî zî vat ke ganî nê merdimî teber de zî serkêşîya komelî bikerê û ê silam kerdî. Keyeyanê şehîdan rê zî silamê xo erşawitî.
Ma ey rê qalê Unîversîteya Kobanî kerd. Rayber Apoyî pers kerd ke çend wendekarê unîversîteyî est ê. Rayber Apoyî vat ke ganî unîversîte de goreyê modernîteya demokratîke dersî bêrê dayene, tesîrê kapîtalîzmî tede çin bo, paradîgmaya ci wa wendekaran reyde bêra parekerdene. Ey vat ‘Ez perwerde zaf muhîm vînena. Ma tim tîya de wanenê û nîqaş kenê.’
Ma ey ra vat ke mabênê HSD û hukmatê Şamî (HTŞ) de peymana bi 8 madeyan ameya îmzakerdene. Rayber Apoyî zî vat ‘Ganî dîyalogê mabênê Şam û kurdan bizêdîyê. Seba ma muhîm o ke Sûrîyeyêka bihêze vejîya orte. Ganî Sûrîyeya demokratîke bêra caardene. Şam hema îslamîperestîye keno. Ganî binê sîwana demokrasîyî de yewîye biba. Ganî xebatê Rojawanî bilez bêrê kerdene. Ganî kurdê Rojawanî vera tehdîtan baldar bibê.’
Ma behsê rewşa DEM Partî kerd. Serekî vat ‘Ganî DEM Partî her ca de konferans û kombîyayîşan bikera û nînan de kesê ke paradîgmaya ma hol zanenê qisey bikerê. Ganî fikrê şarî bêrê girewtene. Ganî Dengizê Sîya de DEM Partî rayanê xo bizêdîna. Ganî Anatolîya de DEM Partî potansîyelê xo bimojna. Tirkîya de krîz û xizanîye est ê. DEM Partî ganî vera nînan bixebita, her ca de hêzê xo bizêdîna. Ganî her ca de yew newebîyayîş est bo. Mîyanê DEM Partî de embazê ma yê ke Dengizê Sîya ra yê est ê. Ganî nê kesî Dengizê Sîya de xebatan bikerê. DEM Partî eke rayanê xo bikera se ra 20 do biba sey îqtîdar û Rojhelatê Mîyanênî de sîyasetêko bitesîr bikera.’
Serek pêvînayîş de bimoral bi. Mi ey rê behsê raporo ke ey erşawito Kongreya PKK’yî kerd. Mi vat ke elewîyî qerqilîyenê û tayê rexneyê înan est ê. Serekî vat ‘Ma tîya de seba elewîyan xebitîyenê. Tîya de embazê ma yê elewî zî est ê. Embaz Hamîlî Yildirim elewîtîya Dêrsimî hol zano. Mi tim qîmet da tewir û têkoşînê Seyîd Rizayî. La ganî ma bi cesaret û raştî serebût û netîceyanê înan bierjnê. No seba Şêx Seîdî zî wina yo. Xora ma rexneyanê raştan qebul kenê.’
Ma behsê êzidîyan zî kerd. Serekî êzidîyan rê silamê xo erşawitî. Serekî vat ke ganî Şingal azad bo, pabesteyê partîyêk yan zî hukmatêkî nêbo, wayîrê statuyî bo. Êzidîyî wa xo rêxistin bikerê û îdareyê xo bikerê.
Tornê xala mi zî ameybî pêvînayîşî. Serekî înan ra vat ke ‘Payan ser de û biîrade bê.’ Serekî rewş û perwerdeyê domanan pers kerd, seba domanan analîz kerd û vat, ‘Wa her kes bi dîsîplîn bo, miqateyê weşîya xo bo, kîlo nêgêro. Wa her kes senî ke leşkerî mîyanê artêşe de têgêrenê, wina têbigêrê.’ Ma nê pêvînayîşî de reya verêne Omer Hayrî Konar û Hamîlî Yildirim zî dî. Mi înan rê behsê rewşa teberî kerde. Ê zî sey Serekî bimoral bîyî. Ê zî qewimîyayîşanê teberî nêzdî ra taqîb kenê.”
Omer Ocalanî pare kerd ke ganî dewlete verê waştişanê şarî de ca de game bierza.
Omer Ocalanî bale ante pêkewtişanê mabênê Îran û Îsraîlî ser o û vist vîrî ke Rayber Apoyî zî na babete de verê cû hişyar kerdbi. Omer Ocalanî vat: “Wextê pêvînayîşî de pêkewtişê mabênê Îran û Îsraîlî hende nêbîyî. Pêvînayîşî ra 6 aşmî ver Serekî behsê Sûrîye, Îran û Iraqî kerdbi û ey vatbi ‘Rojhelatê Mîyanênî de nika yew Gazze est o. Eke verê şerî nêro girewtene, 50 Gazzeyî do bivejîyê orte.’ Seke Serekî vato dîyalog yeno manaya demokrasîyî. Ganî dewletî hinî xo bivurnê. Kurdî zî ganî yewîya xo bîyarê ca, xopawitişî xurtêr bikerê.”
