Warê Rayberê Şarê Kurdî Abdullah Ocalanî Riha de bi hezaran kesî qada Newroze de kom bîyê û bi çoşeko pîl wayîrê vengdayîşo tarixî vejîyayê.
Riha de Newroze bi sloganî ‘Raybero Azad Komelo Demokratîk’ û ‘Seba Azadîye Komelo Demokratîk’ ameye pîrozkerdene.
Pîrozbayî qada venge ya kîşta Stadyûma 11ê Nîsane ya qezaya Xelîlî de ame kerdene.
Parlamentera DEM Partî û endama Heyetê Îmraliyî Pervîn Buldan, Parlamenterê Rihayî Dîlan Kurt Ayan û Omer Ocalan, endamê Meclîsê Dayîkanê Aştî, hemşaredarê qezayan ê DEM Partî, birayê Rayberê Şarê Kurd Abdullah Ocalanî Mehmet Ocalan, waya Alî Çîçek ke sembolê xoverdayîşê Rojeya Mergî yê Gird ê 14ê Temmûze bi Ayşe Çîçek û bi hezaran kesî tewrê pîrzobayî bîyê. Qada pîrozbayîbi alanê partî yê bi rengê kesk, sûr û zer ame xemilnayene û sehneyê ser o pankartê “Raybero Azad Komelo Demokratîk” ame aliqnayene. Welatijê ke bi cil û belganê Kurdkî kewtê qade, demêko derg bi deyîranê Kurdkî govende girewte.
Çarçewaya Kampanyaya Kongreya Demokratîke ya Şaran (HDK) ya “Seba aştî mîlyonêk îmza” de bi hezaran îmzayî ameyê komkerdene. Verê ke pîrozbayî dest pêbikero, bi hezaran ciwanan sirûd vatî û paweyê pîrozbayî vindertê. Ciwanan zaf reyan sloganî “Bijî Serok Apo” berz kerd. Tewrê hewayo serd û varanî zî coşê ciwanan her ke şono zêde beno. Cinîyêka ke bi serran o her Newroze de alaya Rayberê Şarê Kurdî Abdullah Ocalanî berz kena, na Newroze de zî bi çoşêko pîl berz kerd.
Pîrozbayî bi rêzgirewtişî dest pêkerd û dima ra zî Komîteyê Amadekar ê Newroze û hemserekê DEM Partî û DBP’yî şarî silam kerd. Qiseykerdişan de wayîrvejîyayîşê vengdayîşo seserrî yê Rayberê Şarê Kurdî Abdullah Ocalanî ame kerdene.
Endama Meclîsê Dayîkanê Aştî Meyaser Korkmaz wina vat: “Ma Dayîkê Aştî yê û aştî wazenê. Rayberê nê şarî birêz Ocalanî prosesêk da destpêkerdene. Wa her kes wayîrê nê prosesî vejîyo. Êdî bes o. Ma hende dejî bes nîyê. Wa êdî hesrê dayîkan nêrê war. Ma bedelê giranî dayê. Wa êdî aştî bêra.”
