Rêxistina DEM Partiyê ya Torbaliyê êrîşên li ser Rojava daxuyaniyek da û meşek li dar xist. Di daxuyaniyê de hate diyarkirin ku êrişa li ser Rojava êrîşa li ser hêviya jiyana azad a Rojhilata Navîn e.
Rêxistina DEM Partiyê ya navçeya Torbaliya Îzmîrê li Kolana Qehwexaneyan derbarê êrişên li ser Rojava daxuyaniyek da û piştî daxuyaniye heta Çayxaneya Yavuzlar meşiya. Jinên li qadê li pişt hev rêzbûn û di çarçoveya kampanyaya “Keziyên me tirsa we ne” keziyên hev hûnandin. Di daxuyaniyê de pankarta “Rojava ne bi tenê ye, bila erişên li ser Rojava bêne sekinandin” hate vekirin, dovîzên “Rojava rûmeta me ye” hate bilindkirin û dirûşmeyên “Bijî berxwedana Rojava” û “Bijî berxwedana Kobanê” hatin berzkirin.
Hevserokê DEM Partiyê ya Torbaliyê Yavuz Aras daxuyanî xwend.
Yavuz Aras diyar kir ku êrîşên li ser Rojava êdî ji sînorên şerekî leşkerî derketine û got: “Tişta diqewime, ne tenê şer e; pêvajoyeke wêrankirinê ye û bi zanebûn hatiye plankirin. Dixwazin bi van êrişan vîna gelan bişkînin, jiyana pirreng û hevpar ji holê rakin û herêmê radestî tariya çeteyên cîhadîst bikin”
Aras anî ziman ku têkoşîna gelên Rojava ya li dijî hovîtiya DAIŞê, parastina rûmeta tevahiya mirovahiyê ye û wiha pê de çû: “Hewldanên ji bo tasfiyekirina vê têkoşînê, ne tenê li dijî gelê Kurd e, êrîşeke li ser hêviya jiyana azad a Rojhilata Navîn e.”
Aras wiha bangên xwe yek bi yek rêz kir:
“• Pêwîst e hemû êrîşên li ser Rojava di cih de bêne rawestandin.
• Dorpêça li ser Kobanê bê rakirin.
• Divê her cure piştgiriya komên cîhadîst bê sekinandin.
• Divê raya giştî ya navneteweyî li hemberî van bûyeran berpirsiyariya xwe bîne cih.”
Piştî meşê bi berzkirina dirûşmeyan çalakiya protestoyê bi dawî bû.
