Li Şengalê bi merasîmeke bi heybet cenazeyên 25 qurbaniyên fermana 3yê Tebaxa 2014an hatin wergirtin û li goristanên Şengalê hatin veşartin.
Karwanê 9an yê şehîdên fermana 3’yê Tebaxa 2014’an ku ji sala 2019an ve ji gorên komî yên Koço hatibûn derxistin, radestî malbatên wan hatin kirin. Beriya du rojan, 25 cenazeyên qurbaniyên fermana 3yê Tebaxa 2014an ji Daîreya Tiba Edlî ya Bexdayê hatin derxistin û ji bo Mûsilê hatin şandin.
Rûfatên qurbaniyan îro di saet 10:00’an de ji Mûsilê bi rê ketin ber bi Şengalê ve. Cenaze ji aliyê bi hezaran kesî ve li bîrdariya şehîdên fermanê ya li gundê Solê bi merasîmekê hatin pêşwazîkirin. Di merasîmê de nûnerên aliyên siyasî, civakî, leşkerî, malbatên şehîdan û gelê Şengalê bi deqeyeke rêzgirtinê destpêkir.
Piştre rê û rismên olî hatine gêran û lio ber dengê Def û Şibêba û yek bi yek navên şehîdên ku rûfatên wan hatibûn, hatin xwendin û radestî malbatên wan hatin kirin. Piştî ku rûfat radestî malbatan hatin kirin, ku piraniya wan ji Koçoyê bûn, li goristanan hatine veşartin.
Pêvajoya vekirina gorên komî yên qurbaniyên Komkujiya 3yê Tabxê ku ji aliyê çeteyên DAIŞê ve hatibûn kuştin, bi awayekî fermî di 15ê Adara 2019an de li gundê Koço destpê kir. Li seranserê Şengalê bi giştî 96 gorên komî ligel bi dehan gorên ferdî hatine tespîtkirin.
Her wiha heta niha 321 cenaze ji bo Şengalê hatine şandin û zêdetirî 500 cenaze li Bexdayê ne û malbatên wan li bendê ne ku bên vegerandin Şengalê.
