Têkilîyê Rojava û hêzanê mîyanneteweyî qonaxê hemkarîya leşkerî ya demkî ra vîyarenê qonaxê naskerdişê sîyasî. Heyetê Rojava dîplomasîyanê xo yê neweyan reyde pênaseyê ‘tena şervanê baş ê’ xo ra pey verda.
Konferansê Ewleyî yê Munîhî yo 62. seba Rayberîya Xosere bi qadê tescîlkerdişê estbîyayîşê înan ê qadê mîyanneteweyî de. Beşdarîya heyetê Rojava bi serekîya Fermandarê Pêroyî yê HSD’yî Mazlum Ebdî û Hemsereka Dayîreyê Têkilîyanê Teberî ya Rayberîya Xoserer Îlham Ehmed sey naskerdişêko defakto ame erjnayene. No bedilîyayîş mojneno ke estbîyayîşê kurdan û Rayberîya Xosere êdî rastîyêka înkarkerdişî ya. No meşrûîyet eynê wextî de yeno manayê binkewtişê cehdanê Tirkîya yê seba marjînalîzekerdişê kurdan.
Rojava êdî muxatabeka siyasî ya
Heyeto kurd Munîh de xeylê dîplomat, wezîranê teberî û temsîlkaranê sazgehanê ewleyî yê Ewropa û Amerîka reyde pêvînayîşî kerdê. Verê têkilîyê Rojava reyde hîna zaf têkoşînê vera terorî ser o bîyê la Munîh de no pozîsyon ver bi nasnameyêko sîyasî bedilîya. Êdî kurdî sey aktorêkê sîyasî masayanê dinya de cayê xo gênê.
Kulîsanê dîplomatîk de bedilîyayîşêko zelal est bi. Ajansanê xeberan û analîstanê ewleyî êdî Mazlum Ebdî û Îlham Ehmed sey temsîlkarê sîyasî yê şarê kurdî yê Sûrîye pênase kenê. Rojava dîplomasîyê xo yo newe de pênaseyê “tena şervanê baş ê” xo ra pey verda.
Washington de bedilîyayîş
Bedilîyayîşêko bîn o krîtîk zî Washingtonî de xo mojna. Kurdan bi aşman o dîyar kerdêne ke tay kesî nêzdîyê Trumpî, sey Tom Barrack, polîtîkayanê Amerîka yê Sûrîye seba menfaetanê Tirkîya manîpule kenê. Vengdayîşê Barrackî hetê Kongre ra û cipersayîşê têkilîyanê ey ser o, nîşaneyê bedilîyayîşê polîtîkayanê Amerîka yo. Kongre êdî wazena ke her gama derheqê Sûrîye de bi zelalî bêra taqîbkerdene. No mojneno ke mekanîzmaya qerardayîşî ya Amerîka êdî bi guman nêzdîyê cehdanê Barrackî beno ke waştêne kurdan sey hacetêk bimojno. No helwêstê Kongreya Amerîka destê dîplomasîyê kurdan Washingtonî de xurtêr keno û tesîrê Anqara qels keno.
Qonaxê tescîlkerdişê statuyî
Heme hedîseyanê Munîh ra heta Washington û Kobanî mojnenê ke statuyê Rojava qonaxê munaqeşa ra vejîyayp û kewto qonaxê tescîlkerdişî. Seke çimdarê sîyasî vanê, Anqara fehmkerdişê nê bedilîyayîşî de erey kewta û êdî nêeşkena rêbazanê leşkerî reyde vernîya nê meşrûîyetê mîyanneteweyî bigîra. Cehdê seba îzolekerdiş û marjînalîzekerdişê Rayberîya Xosere bi temamî binkewtê.
