Hemserekê Komîteya Karanê Komelkî û Karkeran ê Kobanî Ehmed Xoceyî îfade kerd ke Tirkîya eşkera nêwazena ke Kobanî de têkilîya mabênê HSD û hukmatê Şamî baş biba û vat: “Eke dorpêç nêro hewanayene rewşêka zaf xirab û bi tehluke do vejîya meydan. Sazgehê mîyanneteweyî ganî wezîfeyanê xo bîyarê ca.”
Dorpêçê vera Kobanî 29 rojî xo dima verdayê. Rixmo ke mabênê HSD û Hukmatê Demkî yê Şamî de peymane ameye îmzakerdene û muzakereyî dewam kenê zî dorpêçê vera Kobanî nêame hewanayene. Elektrîk, awe, xida, şitê domanan, sotemenî, derman û ûsn. şarî ser o ameyê birnayene.
Hemserekê Komîteya Karanê Komelkî û Karkeran ê Kobanî Ehmed Xoce ke Kobanî de yo û welatijan reyde nêzdî ra eleqedar beno, ajansê ma rê derheqê rewşa peyên a Kobanî ed qisey kerd.
‘Dewleta tirkan nêwazena ke Kobanî aver şêra’
Xoceyî dîyar kerd ke rixmo ke mabênê HSD û Hukmatê Demkî de averşîyayîşî est ê zî dorpêç nêameyo hewanayene û vat: “Grûbê çeteyanê ke girêdayeyê Hukmatê Demkî yê Sûrîye yê nêzdîyê 70 dewanê Kobanî de cayê xo girewto û hema zî xo apey nêanto. O yo ke nêwazeno averşîyayîş bibo dewleta tirkan a. Dosyaya Helebî destê Tirkîya de ya, coka dewleta tirkan eşkera nêwazena ke Kobanî de averşîyayîşêk bibo.”
‘Sazgehê mîyanneteweyî zor nêdanê hukmatê Şamî’
Xoceyî vat ke Neteweyanê Yewbîyayeyan Kobanî zîyaret kerd û da zanayene ke rixmo ke înan rewşa Kobanî înan reyde pare kerda zî tu teda Hukmatê Demkî yê Şamî ser o nêameyo kerdene û qiseyekerdişê xo wina domna: “Xaça Sûre ya Dinya û UNESCO’yî Kobanî zîyaret kerd la tena derheqê hetkarîya însanî de qisey kerd, hetê sîyasî ra tu tedaya Hukmatê Demkî nêkerd. Wexto ke hewcedarîyê cuye şaristanêkî ser o bêrê birîyayene o şaristan nêeşkeno biciwîyo. Welatijê ke nêweşîyê înan ê gurçik, şeker û kanserî est ê nêeşkenê bêrê dermankerdene. Eke dorpêç nêro hewanayene rewşêka zaf xirab do vejîya meydan.”
